3 أسباب يخلوك ترفض ترتبط بـ “خدامة”

في شريحة كبيرة من الرجالة لما بتحب ترتبط بتبقى بتدور على “خدامة”!! وحتى ولو ماكنش بيدور عليها لفظًا, فهو ضمنيًا وفكريًا مش عاوز واحدة في البيت أكتر من كونها بتخدمه وبتخدم ولاده .. واحدة كل شغلها الشغال تطبخ وتغسل وتنضف وتلبي احتياجاته الجسدية! لا أكتر ولا أقل! بس الحقيقة إن الموضوع لا في صالحه و لا صالح ولاده:

نظريًا ولاد الـ “خدامة” حيكونوا ايه؟! فالست اللي معندهاش أي طموح أو رؤية مستقلة لذاتها أو كيانها أكيد مش حتعرف تسقي النقطه ديه في اولادها سواء بنات أو حتى ولاد,, ففي فرق بين واحدة ست قررت تدي اهتمام اكتر لتربية أولادها وست كانت فاشلة في حياتها واضطرت انها متعملش أي حاجة غير القعدة في البيت, فالأولى حتربي أشخاص يعرفوا يرتبوا اولوياتهم والتانية حتربي أشخاص مش عارفين يعني ايه أولويات …

“الخدامة” ميشغلهاش غير “سيد” .. طبعا ديه نقطة رجالة كتير عندهم نقص بيحبوها, بس لو حصل ولا قدر الله السيد وقع أو تعب, الخدامة متعرفش تشيل بيت! فهي عاشت طول عمرها على تنفيذ الأوامر والطاعة العمياء .. مش التفكير الحر واتخاذ القرارات,, فلو انتا مرتبط بخدامة متتوقعش ابدا تشيلك في وقت حاجة أو تكون قائد في وقت زنقة ..

عقلية “الخدامة” … انتا متوقع حيكون إيه الأفكار اللي بتتوارد في دماغ الـ “خدامة”, فالحقيقة إن عقليتها ليست إلا مصنع للهري! تربة خصبة للتفاهة والسذاجة!! .. هي حاجة كويسة لشخص مش مهتم بنوعية فكر الإنسانة اللي حيرتبط بيها او بيحب يكون مع واحدة يعرف يضحك عليها أو يتخابث على ذكاءها الضعيف ده .. بس مع الوقت بيتدي الشخص يحس انه لازم يتعامل مع شريك فاهم و مدرك .. شريك حر في إدركاته وأفكاره … شريك مساوي له في المنطق والعقل .. شريك مش خدامة!!

في النهاية في جملة بتقول A strong man can handle a strong woman. a weak man will say she has an attitude بمعني ( الراجل القوي يقدر يتحمل ست قوية إما الراجل الضعيف بيقول دي بتناطحني!) ,, فأوعي تدور على “خدامة” أو حتى تجبر اللي انتا بتحبها تتنازل على كرامتها وأحلامها .. أوعى تهددها بحبك ليها أو حتى ترهبها بأي مدخل ديني أو اجتماعي عشان تبقي خدامة ليك ولعيالك! أوعى توصلها انها تخسر نفسها عشان قناعاتك المشوهة وأفكارك المريضة! .. إنما شجع فيها حتة القيادة والجراءة .. ساعدها دايمًا تبقى منورة في حياتها ومستقبلها .. خليها تحس دايما إنها بتحرك معاك الأمور, أنها رأي مؤثر في حياتكوا وفي حياتك إنها بالذات! … فهي سندك وقوتك الحقيقة … ويبقي زي ما قال عمنا “نزار قباني”:
( .. لا تخاف من الارتباط من امرأة قويه ربما يأتي يوماً تكون هي جيشك الوحيد … )

كيرلس بهجت

kirolloc be\get

كيرلس بهجت

طبيب مهتم بالقراية والتدوين

اقرا كمان ل كيرلس بهجت