يعني أيه مصري ؟

مؤمن سلام

لما بقول أنا مصري فده إعلان له جنبين، جنب سالب بينفي انتمائي لهويات تانية، وجنب إيجابي بيقول أن انتمائي لمصر. طيب دهم معناه انى متعصب شوفاني بكره الناس التانية؟ الإجابة ببساطه، لا، فمعنى انتمائي لهوية معينه مش معناه انى كاره أو رافض أو عايز أحارب واسيطر وأحتل الآخرين، لأن مش معنى أنى اقول أن اسمي “مؤمن” معناه انى بكره محمود، وعايز اقتل هاني، وعايز أحارب شنودة، وعايز اقتل علي، كل الموضوع انى بعرف هويتي.

ولما نيجي نبص على الهويه المصرية حنلاقيها أخر هويه ممكن تكون مصدر كره أو تكبر أو رفض للأخر. الهوية المصرية هويه بتجمع جواها سقافات وحضارات وأديان كتير، من المصرية القديمة، للهلينستية، للرومانية، للمسيحية، للعربية الإسلامية، والأفريقية، والأوروبية الحديثة، والنوبية، والأمازيغية. عشان كدة بقول أن مينفعش المصري اللى هويته فيها كل الهويات دي ينفع يتعصب ضد غيره لأنه كده حيبقى بيتعصب ضد جزء من هويته الشخصية.

واللى حيبص على مصر حيلاقي أن التعصب والتطرف دخلها لما سيبنا هويتنا المصرية وبدانا نقول احنا عرب وبعدها قولنا احنا مسلمين. لأن لما نقول على نفسنا عرب فده معناه أننا بنستبعد مكونات هويتنا اللى مش عربية، بنستبعد النوبيين والأمازيغ واللى من أصول أوروبية وبنلغي من تاريخنا 6000 سنة قبل دخول العرب مصر. ولما نقول احنا مسلمين ونحول الدين لجنسية فده معناه أننا بنلغي من هويتنا المكون المسيحي واليهودي والفاطمي والشيعي لأن الناس بتعتبرهم مش مسلمين، وكمان بنلغى من تاريخنا أكتر من 6000 سنة قبل المسلمين ما يبقوا أغلبية السكان في العصر الفاطمي.

كمان لما نقرا تاريخنا حنلاقي أن انتصارتنا ونهضتنا كانت دايما مروبطة بهويتنا المصرية. وخلينا نبص على تاريخنا الحديس، حنلاقي أن نهضة مصر في عهد محمد علي وأولاده كانت مبنية على أساس الهوية المصرية، لما اتلغت الجزية عن المسحيين ودخلوا الجيش المصري ولما اتلغت العبودية ومن بعدها السخرة وبقى كل المصريين أحرار ولما بقى المسيحيين والمسلمين بيشاركوا في حكم البلد وزرا ورؤساء وزرا، لما المسقفين والسياسيين المصرين بقا شعارهم مصر للمصريين. لكن لما بقينا نقول احنا عرب واتمحى اسم مصر من الوجود حصلت الهزايم وكارسة 1967، ولما قلنا احنا مسلمين، ضيعنا كل قوتنا الناعمة وبقينا بنشحت من كل من هب ودب.

عشان كده بنقول احنا مصريين وفخورين بمصريتنا، وده مش معناه عداوه مع حد بالعكس احنا بنحب الناس كلنا ومستعدين نشتغل مع الناس كلها ونسالم الناس كلها، طالما ده فصالح مصر ومش بيضر بأمنها.

عاشت مصر، وعاشت الأمة المصرية

مؤمن سلام

mo`omin cellem

مؤمن سلام

• بكالوريوس علوم سياسية - جامعة الاسكندرية • كاتب ومدير موقع حركة مصر المدنية • له كتابين على الانترنت "العلمانية ببساطة" و"الليبرالية ببساطة"

اقرا كمان ل مؤمن سلام