وهم المثالية

(( .. لا تحرموا الإنسان من الكذب و لا تدمروا تخيلاته ….. لا تدمروا خرافاته و لا تخبروه الحقيقة .. لأنه ببساطة , لن يتمكن من العيش من خلال الحقيقة ! .. )) فريدريك نيتشه

سنة 2001 و تحت إشراف دكتور Hodges B , أتعلمت تجربة لتقييم أداء مجموعة من الاطباء الجدد لنفسهم و أزاي كل واحد منهم شايف مستواه في الطب .. و اللي كشفت إن شريحة كبيرة من الأطباء دول قيموا نفسهم أنهم أفضل من الحقيقة بفرق شاسع ! بالرغم من إن الواقع و الأدلة صرحت بعكس كدة !! …. تمر الشهور و تيجي سنة 2003 و تحصل تجربة مشابهة تحت إشراف الدكتور David Dunning بس تبقي علي مجموعة من الطلاب في إمتحان , و يطلب منهم تقييم إداءهم لنفسهم , و تظهر النتيجة برضة , إن أغلبهم يقيم نفسه بأنه أفضل من مستواه الأصلي !! … .فتبقي الحقيقة , إن ساعات كتير العقل الإنساني بيوهم صاحبه أنه أعلي من أمكانيته و ظروفه لمجرد أنه يقدر يعيش .. يوهمه أنه الأفضل , أنه الأذكي , أنه المثالي !!

مشكلة الوهم ده أنه بتسرب لكل سلوكيات و أفكار الشخص , فيبقي تحليله للامور مفهوش جدال او نقاش , نظرياته و إدراكاته هي الصح المطلق .. حتي تصرفه في اي موقف هو التصرف الأمثل ! .. فانتا مين او انتي مين عشان تعدلوا او تنقدوا موقفه ؟!!! .. فكل شخص فينا – بلا إستثناء – عنده جزء بسيط من الوهم ده .. جزء بيعميه عن تفاصيل و روابط ممكن تغيير من قناعاته و أراءه .. جزء بيغذي عناده و غروره الشخصي .. جزء بيحبسه جوا قوقعة المثالية الذاتية و يخليه مش قادر يخرج براها.. أو بمعني أصح مش عاوز يخرج براها ,,

أصل برا , فيه الحقيقة .. الحقيقة اللي حتقل من نظرتك لنفسك .. الحقيقة اللي حتكشف لك حجمك الفعلي .. الحقيقة اللي حتشاور لك علي عيوبك و نواقصك و توضحها لك بالدليل و البرهان ! و مين عاوز حقيقة تنكد عليه هو عنده وهم مخليه أعلي من الكل .. مخليه مثالي ؟! .. بس المشكلة دايما في اللي حواليه .. اللي بيصبوا عليه من برا و شايفينه زي الأعمي مش قادر يدرك أشارات و العلامات ديه .. شايفين حد متحجر رافض يسمع صوت تاني غير نفسه .. حد بيعيب في اللي يقوله كلام مش علي مزاجه .. حد موهوم ! .. فيبقي زي ما قال الكوميديان ” ريكي جيرفيه ” : ( .. عندما تكون ميتاً، فإنك لا تعلم أنك ميت، إنه أمر مؤلم فقط للآخرين. نفس الشيء ينطبق عليك عندما تكون غبياً ..! )

ففي النهاية .. عاوز تقتنع أنك عملت التصرف المثالي , قلت الرد المثالي , جاوبت الإجابة المثالية .. كل ده براحتك خالص .. فوهمك من نفسك و لنفسك .. !! بس فعلا صعب جدا تقنع غيرك بكدة .. فمن حقك كأنسان حر أنك تعيش بوهمك و تسمتع بيه … بس قمة الألم و القهر أنك تجبر كل اللي حواليك يعيشوه معاك ..

 

كيرلس بهجت

kirolloc be\get

كيرلس بهجت

طبيب مهتم بالقراية والتدوين

اقرا كمان ل كيرلس بهجت