هو احنا بنكتب صح؟ (7)

ناريمان الشاملى

بعد ما اتكلمنا عن المشاكل، هقول المرادي الحلول اللي بعض علماء اللغة ذكروها.
1- نكتب بالحروف اللاتينية:
الكلام دا قاله عبد العزيز باشا فهمي، وطبقه فعلا كمال أتاتورك، وهو إقتراح جميل وزي الفل، بس مشاكله كتير. منها مثلا: هنعمل ايه في الأصوات اللي مش موجودة ليها شكل في الرموز اللاتينية (زي العين مثلا)؟
جيل أو اتنين بالكتير، وياإما نلحق نكتب كل الكتب بتاعتنا باللاتيني، ياإما هنلاقي ناسنا، مش بس مش فاهمين، مش عارفين يقروا تاريخهم البعيد والقريب.
2- نرجع لأصولنا ونكتب هيروغليفي:
كلام حلو برضه، وهوية وبتاع. بس احنا عايزين نطلع لقدام مش نرجع لورا. والكتابة الهيروغليفية، رغم معزتها في قلوبنا، متأخرة وبعيدة خالص عن قاعدة الكتابة اللي بنتكلم عنها من الصبح.
3- نخترع شكل كتابة جديد خالص:
ودا السيد عثمان صبري قاله في كتابه “نحو أبجدية جديدة”. وفيه علماء لغة تانيين فعلا رسموا رسمومات جديدة لأصوات اللغة العربية. ومعنديش تعليق على الكلام دا غير تقريبا نفس اللي قلته في الاقتراح الأول.
4- نصلح الكتابة العربية/المصرية ونعمل عليها شوية تعديلات:
بصراحة، دي أقرب الحلول لقلبي. مش لأي سبب غير لإنها فعلا مش سيئة أوي كدا. وعيوبها ممكن تتلم في كام قاعدة جديدة وخلاص، ويبقى مبعدناش أوي عن تاريخنا القديم والجديد.

طيب والقراءان المقدس؟ هنغير فيه؟
هنشوف الموضوع دا المرة الجاية.

ناريمان الشاملى

nariman il]amli

ناريمان الشاملى

مترجمة وكاتبة من مواليد القاهرة ١٩٨٣. عايشة وبتشتغل أستاذة في جامعة طوكيو للدراسات الأجنبية في اليابان. معاها ماجيستير من الجامعة الأمريكية في تعليم اللغة العربية للأجانب. مهتمة باللغات بشكل عام وباللغة المصرية بشكل خاص.

اقرا كمان ل ناريمان الشاملى