هو أنا عربي؟!

مؤمن سلام

عشان نجاوب على السؤال دا احنا محتاجين نجاوب على كام سؤال كده عشان نعرف نجاوب على السؤال الأم.

السؤال الأول هو أنا عربي بالنسب؟

الإجابة لأ لأن العرب هم شعب من الشعوب السامية واللي كانت موجودة ف الجزيرة العربية وقرب الشام والعراق، واثبتت اختبارات d.n.a  ،اللي اتعملت على عينات عريضة من المصريين، انهم ملهمش نفس الصفات الوراثية للعرب وإن 7% بس من سكان وجه بحري عندهم صفات وراثية غير أفريقية، وف وجه قبلي 5% بس، والدراسة بتقول إن النسبة دي مبتقولش انهم عرب، لكن نسبة العرب ف مصر هي شوية من 7% و5% المش مصرية.

ممكن تشوف الدراسة دي هنا

وبالتالي أنا مش عربي من ناحية النسب

السؤال التاني هو أنا عربي باللغة؟

إذا كانت اللغة العربية الأصيلة هي لغة الجزيرة العربية وخاصة اليمن، فهل اللي بيتكلموه المصريين هي لغة عربية؟ هو المصريين بينطقو الجيم “ي”؟ هو المصريين بينطقو الغين جيم مش معطشة ؟ هو المصريين بيفهمو كلام  اهل الجزيرة؟ هو اللغة المصرية الحالية هي لغة عربية أصيلة ولا هي خليط مابين القبطي والمصري القديم والعربي ولغات تانية كتيرة انتجت اللي ممكن نسميه لغة مصرية حديثة؟ طبعا مش هيحس ويعرف كلامي ده إلا واحد عاش ف الخليج حيقدر يقول بشكل قاطع إني مش عربي باللغة.

السؤال التالت هو أنا عربي بوحدة التاريخ زي مابيقول القومجية؟

وهنا نسأل هو تاريخ مصر بيبدأ بدخول العرب لمصر؟ طبعا مفيش عاقل حتى لو جاهل ممكن يقول كده لأن تاريخ مصر العريق مينكرهوش إلا مجنون. ايوة اشتركنا مع العرب ف جزء من التاريخ لكن هل دا  معناه إننا بقينا أمة واحدة؟ لو كان دا صح ليه مبقيناش أمة واحدة مع اليونان أو إيطاليا اللي اجتمعنا معاهم ف فترات طويلة من التاريخ فليه العرب مش اليونان ولا ايطاليا؟

إذن أنا مش عربي بالتاريخ

السؤال الرابع هو أنا عربي بحكم وحدة الهدف؟

ايه هو الهدف اللي بيسعى له العرب ولازم اني اسعى معاهم فيه؟ ايه هدف العرب؟ إذا كان الحكام والشعوب ملهمش هدف واحد، فالحكام هدفهم الوحيد البقاء ف السلطة لأطول، أما الشعوب فكل شعب من الشعوب دي له هدف وطموح مختلف عن الباقيين، كل شعب مستعد يدوس علىأي شعب أو دولة تقف ف طريق أحلامها.

يبقى أنا مش عربي بوحدة الهدف لأن أصلا مفيش هدف للعرب.

السؤال الخامس هو أنا عربي بوحدة المصير؟

ايه هو مصير العرب، حد يعرف؟ اعتقد كل دولة هيكون ليها مصير مختلف فمنقدرش نقول إن في مصير واحد للعرب، هو في حد يعتقد أن مصير مصر هو نفسه مصير الخليج بعد نهاية هوجة البترول؟ مظنش أن حد ممكن يقول دا وإلا هيكون فقد عقله.

إذا فانا مش عربي لانه مفيش مصير واحد للعرب

إذن أنا مش عربي أنا مصري

ممكن ترجع لأصل المقالة هنا

 

مؤمن سلام

mo`omin cellem

مؤمن سلام

• بكالوريوس علوم سياسية - جامعة الاسكندرية • كاتب ومدير موقع حركة مصر المدنية • له كتابين على الانترنت "العلمانية ببساطة" و"الليبرالية ببساطة"

اقرا كمان ل مؤمن سلام