هل فعلا الانسان مبباخدش كل حاجة

في أفكار كتير بتتخانق في دماغي عن ايه اللي بيوقف البني آدم عن إنه يوصل للي هو عاوزه ..
وفي نظري فالاسباب مبتخرجش عن الخوف على ضياع مكتسبات واقعية نتيجة لرضا الانسان بوضعه
– عدم ثقة الانسان في أن مايريده هو الصواب له ..
أما عن خوف الانسان على مكتسباته، فالإنسان بيبرمج عقله على الرضا بالأمر الواقع خوفا من أن يكون البديل اسوأ .. فإحساس الندم من اسوأ الاحاسيس التي بتوجع البني آدم…
ويأتي دور المقولات التخديرية كمسكن طبيعي “انت احسن من غيرك”، “محدش بياخد كل حاجة” …الخ ..
انا بتفق مع مقولة لكل حاجة تمنها.. لكن في تمن الواحد بيدفعه البني ادم وهو راضي وتمن تاني بيدفعه وهو مقهور ..
فإذا كنا مضطرين لدفع التمن ليه مندفعش واحنا راضيين ومستريحين …
في النهاية الحياة مجموعة من الموائمات والقرارات .. والسعادة حاجة نسبية ومفيش قواعد بتحكم الشعور الإنساني ..
بس في ناس بيحتاجوا ايد تتمد لهم بالدعم والتشجيع .. ممكن كلمة تغير حياتهم للافضل …
اما عن شكوك الانسان في قراراته .. فهل يوجد صح مطلق او غلط مطلق ؟ ..
وليه الخوف من الغلط … هل التجربة هدف؟ .. ولا الوصول للحاجة المظبوطة قدر الامكان هو الهدف؟ .. وما تعريف الحاجة المظبوطة؟ وايه تعريف الصح؟ .. مش الصح نفسه نسبي؟ الصواب نفسه نسبي … مين يقدر يحكم ان ما اللي بعمله هو الصح؟ وايه هي المعايير؟
الانسان مبياخدش كل حاجة … لكن مين قال الانسان عايز كل حاجة اصلا …
الانسان عايز اللي يريحه ومش غلط ان الانسان يعيش يطور نفسه ورغباته …
يعيش !!! مين فينا عايش … مين فينا بيحاول يوصل للشئ اللي يخليه سعيد .. بيحاول ياخد كل حاجة .. كل حاجة هو عايزها .

Dalia Elraies

delie el-rai-ic

داليا الريس

مهندسة ناشطة في مجال العلمانية وحقوق المرأة

اقرا كمان ل Dalia Elraies