هل الرقص مرتبط بالتعري

ناس كتير بتعيب على الراقصين أنهم بيكشفوا أجزاء من جسمهم، مع التلميح ساعات والكلام بصراحة  بالإباحية وإثارة الغرائز. والكلام عادة بيبقى بتوع الرقص البلدي، وساعات الراقصين المحترفين في الرقصات التانية، زي التانجو مثلا، بيتوجهلهلم نفس الإتهام،

والسؤال هنا ليه؟! ليه الرقص مرتبط بشكل من الأشكال بالتعري؟!

أولا لازم نعرف الرقص عشان نفهم احنا بنتكلم عن ايه، الرقص هو عبارة عن سلسلة من الحركات المترابطة والمتناسقة وماشية على نمط موسيقي معين، ساعات سلسلة الحركات دي بتعبر عن فكرة معين أو شعور معين، وساعات بتبقى عبارة عن مجرد حركات استعراضية. الاستعراض والتعبير  دول بيستخدم فيهم الموسيقى والجسم بشكل رئيسي في التعبير، بيستخدم الموسيقى المناسبة للموضوع أو الاستعراض وبيستخدموا جسم الراقصين في آداء الحركات المناسبة.

طب ايه علاقة الرقص هنا بالتعرية؟!

كده لازم نفصص الموضوع عشان يبقى واضح اكتر ونسأل اول سؤال وهو، هل الرقص كاستعراض بيتطلب تعرية الجسم؟!

الرقص بوصفه استعراض مش بيستخدم  تعرية الجسم كاغراء، فعليا هو مش بيستخدم تعرية الجسم نهائي، ويمكن لو اتكلمت مع الراقصين عن التعري في الرقص احتمال كبير يبصولك باستغراب وهم مش فاهمين انت بتتكلم عن ايه بالظبط.   ولو دورنا على انواع الرقصات المختلفة هتلاقي  انواع مستخدم فيها  ملابس بتغطي الجسم كله، ومن هنا نقدر نقول إن “الراقصين بيستخدموا التعرية” دا منطق فاسد، لإنه مش واقعي.

راقصين بالروم

 طب الراقصين بيعملوا ايه عشان يجذبوا الجمهور؟!

نقدر نقول إن الراقصين الاستعراضيين بيستخدموا حاجة مهمة جدا في جذب الجمهور، وهي ..الزخرفة, زخرفة الموسيقى وزخرفة الجسم وزخرفة اللبس. زخرف الموسيقى هي انتاج واختيار موسيقى تدي الراقصين الاستعراضيين المساحة أنهم يبدعوا ف حركات قوية وصعبة على قد مايقدروا، وزخرفة الجسم من خلال الحركات، ودي هتبانلك اوي لما تعمل مقارنة مابين ناس هواه بترقص في نادي من أندية الرقص  للانبساط ومابين عرض راقص لمحترفين، هتلاحظ أن الحركات الأساسية اللي الراقصين الهواه بيستخدمواها في الرقص قليلة في حين أننا هتلاقي حركات استعراضية اكتر. حركات جمالية ممكن تشوفها في رقصات تانية، وزخرفة اللبس من خلال العناصر الجمالية اللي فيه من الوان مبهجة وتناسق ومواد بتلمع “براقة” واشكال وتصميمات زاهية، وكل دا بيصب في انك بتشوف عرض جمالي متكامل بيبهج عينك مع موسيقى بتبسطك.

امال ايه التعري الواضح في الرقصات الاستعراضية دا؟!

في حاجتين مهمين هم اللي بيحدد زي الراقص، اول حاجة للثقافة اللي جابة منها كل رقصة، زي البالروم “رقص الصالونات” واللي طلعت في أوروبا ودا واضح ف أزياء الراقصين الاستعراضيين في الرقصات دول لأن الولاد بيلبسوا بدل كاملة والبنات بيلبسوا فساتين  وجبيتها  طويلة،

راقصين بالروم

أما رقصات زي السالسا والرومبا والسمبا، فهم رقصات جايين من امريكا اللاتينية واحنا شوفنا في مقالة “عن باكيدج شاكيرا وسلمى حايك، ازاي أن بتوع امريكا اللاتينية معندهمش كسوف من اجسامهم، حتى زي جيرانهم في امريكا الشمالية.

راقصة برازيلية

ومثلا بالنسبة للرقص البلدي -واللي معظم الآراء رجحت أن أصله مصري قديم- فهنلاقي أن بدلة الرقصة البلدي التقليدية فيها تشابه كبير مع ملابس بنات مصر في الحضارة المصرية القديمة، يمكن الحاجة اللي اتضافت هنا هي البرا، لأن في مصر القديمة البنات مكنوش بيغطوا صدورهم لأنهم مكنوش بيتكسفوا منه.

راقصة من مصر القديمة ومحترفة رقص بلدي من عصرنا، شوفوا التشابة في اللبس

عاملة مصرية بتعمل بيرة

الحاجة التانية اللي بتحدد زي الراقص هي حركات الرقصة نفسه، فرقصة زي السالسا حركاتها الاستعراضية قوية ومعقدة ومرتبطة بالرجلين بشكل كبير، فالراقص والراقصة لازم يكونوا لابسين حاجات تسمحلهم بحرية أكبر في حركة رجليهم وايديهم، وانا كمتفرج لازم اكون شايف حركة رجلين الراقصين وإلا كأني مبشوفش حاجة.

سالسا

رقصة زي التانجو هتلاقي أن حركات الرجلين في الرقصات الاستعراضية كبيرة وفيها حركات اكروباتية  منها برقصة التانجو اللي الهاوي بيروح يتعلم تانجو عشان يقضي وقت حلو، وبالتالي كان لازم يبقى فيه كومبينة مابين الكلاسيكية اللي في رقصة التانجو والحركات الاكروباتية اللي في الرقصة فكان الحل الأنسب هو فساتين السهرة المفتوحة. على عكس السالسا اللي فيها جراءة اكتر لأنها فضلت مرتبطة بالناس العاديين.

السؤال اللي بيغطي الجزء التاني، هل في علاقة مابين الراقصين الهواه والتعري؟

منقدرش نقول دا، بس نقدر نحط ايايدينا على حاجة مهمة، وهي ان متمرس الرقص سواء محترف أو هاوي، هو اتعود -عن طريق الرقص- انه يحرر جسمه من القيود والخوف المرتبط بيه، ويعبر عن أفكاره ومشاعره ورغباته بجسمه. وبالتالي صعب يكون عنده الكسوف اللي عند اي حد مجربش النوع دا من الفنون، زي الكاتب كده، لأنه محترف في استخدام لغته فهنلاقيه قادر يتكلم في كل موقف، وعنده الجراحة والسهولة اللي تخليه يستخدم المصطلحات في وقتها الصح. ومن هنا نتكشف أن اللي احنا شايفينه تعري، هو مش تعري ولا يحزنون، دا مجرد انطلاق وحرية معظمنا لسة مجربنهاش قبل كده.

انطون ميلاد حنا

antwn milad

انطون ميلاد حنا

كاتب وباحث ... صدر له كتاب اللغة المصرية الحديثة - دراسة وصفية

اقرا كمان ل انطون ميلاد حنا