منطق اللف ولا منطقيه الدوران

اتفرجت علي فيلم لف ودوران
واسمحولي اني اتكلم عن الشخصيات بتاعت الفيلم كتصميم وبناء شخصيات
للمرة العشرومية بعد المليون ترفع دنيا سمير غانم شعار
انا بلبس هوت شوت بس مبسلمش علي ولاد
الحقيقه إن الأزمة في الشخصية اللي بتتعمد تلعبها دنيا هي انك تحس ان علي راسها بطحة
محدش بيتهمك بحاجه يا دنيا والله يا بنتي، واللي هايتهمك مش هايسمع مبرراتك
بس خلونا نتكلم بالتفصيل عن دور “ليل”
دنيا سمير غانم/ ليل بنت قررت تعمل موقع للجواز وسمته ايه ( الست لما ) لما ايه بقي ؟
اه وربنا اصله دا مش افيه……. فخليني اسالك …لما ايه ؟
وبعدين بيحصل ظروف ما في الفيلم بتضطر انها تعيش مع احمد حلمي/نور وعيلته كلها وصاحبته الايطاليه في فيلا في شرم الشيخ علي انها مرات نور، فبنلاقي بقي نمط البنت المصريه الغريب للتصرف في الامور.. اي فعل من نور هو دعوه للانحراف الي بتصدها ليل بمنتهي القوه والحزم ..ايوه انا بنت دوغري ومحترمه امال ايه!!
الحقيقه ان انا شخصيا كنت طول الوقت مع نور في شعوره ب هو ايه الي حصل انا قولت ايه انا عملت ايه طيب ؟!
بعد كده نفس البنت “الدوغري المؤدبة” دي بتحط مجله للمثليين جنسيا قدام صاحبه نور عشان تطفشها
انا مهتمة الحقيقة باني اعرف هي جابت مجله بورنو للمثليين منين المؤدبة الدوغري دي؟!
وبعدين بتطور الأحداث انهم يبقوا في جزيرة لوحدهم
فبعد اول ليله بيات علي الجزيره الفاضيه الي مفهاش اكل دي بتصحي استاذة “ليل” عشان تصرخ ولا كأن لدغها عقرب، لدرجه ان “نور” صعب عليا !”والله وهو صاحي مرعوب، عشان -قال ايه- ” ايه ده انا بايته معاك علي الجزيره لوحدنا”
ايه يا جدعان ينفع الكلام الفارغ! ده فين الاستاذ المخرج! دي طريقه شغل! هو محدش كان متفق مع الاستاذه علي بيات! طب ده كلام ست عندها طفله وزوج زمانهم قلقانين عليها دلوقتي!
ايه يا “ليل” الافوره دي! هو انتي في ايه ولا في ايه دماغك حادفه شمال ليه كده يا حبيبتي طب شويه ثقة في نفسك بلاش في “نور”

وبعدين تبدا رحله انهم يلاقوا اكل فيقرر “نور” انه يصطاد ويعيني يقعد تحت الشنس لما ضهره يتحرق من الشمس
فتقوم “ليل” عارضه عليه انها تحطله.. اه والله يا مؤمن هي اللي عرضت انها تحطله كريم حروق
وتقوم بقي حاطه الكريم بطرف صوبعها او تقوم دلقاه كده ولا مبيض المحارة اللي هو ما تكوبيه عليه احسن او اقفي بعيد واعملي مور واحدفيها عليه يا ليل واحنا في السينما هانصقفلك ما انتي جبتي جون …
“ليل” بتقول اي لمس بين راجل وست يتبعه مباشره دعوه للانحراف… انتي حطيتيلي كريم وانا ظهري محروق!
ده احنا نشوف حته متدارية علي الجزيرة بقي…
الحقيقة انا لحد هنا وضغطي كان عالي وهاموت بقي بس الحمد لله الفيلم خلص بعديه بمشهد عظيم
وهو وقوع “نور” في حب “ليل” بعد كل الحركات “المؤدبة الجميلة الدوغري” اللي عملتها، متناسيا الرجل بكل احترام دماغها الشمال وأفكارها المشبوهة وتشكيكها طول الوقت في نيته.
اه بالمناسبة طلعت “ليل” هي اللي مرتبة انهم يباتوا لوحدهم علي الجزيرة بس تقريبا كانت ناسية
انا معرفش المؤلفة ودنيا سمير غانم كانوا عاوزين يقولوا ايه للمجتمع غير انها بهوت شورت بس مؤدبة
لكن عموما احب اقولكوا إن المجتمع مش مهتم

لميس البمبي

lemuc il bambi

لميس البمبي

معماريه من المعماريين وشويه حاجات تانيين

اقرا كمان ل لميس البمبي