معضلة المثالي السينجل

من فترة (المقالة دي اتكتبت ف اواخر 2015)، صرحت الفنانة الجميلة Jennifer Lawrence لمجلة Vogue , أن عندها مشكلة في التعرف على رجالة جديدة في حياتها !! فبالرغم من جمالها و شخصيتها وشهرتها إلا أنها مش عارفة تلاقي الراجل المناسب! .. وهنا كان لازم نسأل نفسنا سؤال مهم جدا, إزاي واحدة زي Jennifer Lawrence , مش لاقية حد كويس؟!! المفروض حد بالموصفات الرائعه بتاعتها ديه, تكون عنصر جذب لرجالة مناسبين كتير وهي تختار ما بينهم! فإزاي حد مثالي زي Jennifer Lawrence بتشتكي انها لسه سينجل!؟

الكاتبة Shauna H Springer في مقالة بعنوان How Perfectionism Hurts Relationships (كيف تؤذي المثالية العلاقات ؟), بتتكلم ان ساعات بيكون سبب فشل الشخص في دخول أي علاقة أو استمرارها انه شخص مثالي, فممكن الشخص اللي أحنا بنشوفه من بعيد حد محصلش, شخصية عبقرية, كائن أسطوري, يكون شخص فاشل انه يبني أي علاقة عاطفية مع أي حد, و المدهش, إنه ساعات بيكون السبب في صفاته الأسطورية دية! بس إزاي؟!

الشخصية الـ perfectionist أو المثالي, دية نوع شخصية بتتربى، جوا الشخص من وهو صغير , على إن كل حاجة في حياته لازم تبقي 10 على 10 , فهو شخص لو حس انه رقم اتنين في أي مكان يتعب ويتوتر, مش بيقبل الفشل تحت أي مسمى أو عُذر, ولو وصلت انه يبقي قاسي جدا مع نفسه عشان يحافظ علي الوضع المثالي اللي هو بيرتاح فيه! , فالعلاقة العاطفية بتبقي زي أي حاجة تانية في حياته بيكون هدفه فيها إنها تبقي مثالية, وهو ده جوهر المشكلة ..!

فالمثالي عاوز مثالي زيه, حد مفهوش غلطة, حد خيالي!! و الصراحة ده حقه, حقه أنه يدور على الأفضل, بس اللي مش بياخد باله منه المثالي, أنه حتى الشخصيات المثالية ممكن تغلط أو يكون فيها عيوب بسيطة .. وده مينتقصش منها أو يخليها متستحقش فرصة تانية, فالحقيقة, إن دية الطبيعة البشرية أنه لسة متوجدش الشخص الكامل, أنما الحب هو اللي بيخلي أي حاجة كاملة ! .. ساعات برضه بتكون مشكلة المثالي مع نفسه , فهو مش مجرد مش شايف حد مثالي, لا ده حتى لو شاف وتعلق بيه, ساعات بيكون خايف من تطور العلاقة, ليفقد شكله المثالي ده قدامه, فقمة رعب الشخصية المثالية إنها تحس في أي لحظة إنها مش مثالية آو إنها مقترنة بحد مش مثالي!

في النهاية, حقتبس جزء من رواية ” فلتغفري ” للمبدعة ( أثير عبدالله النشمي ) :
” .. انتِ تدركين جيداً مثلما أدرك تمامًا .. بأنني لست برجل مثالي .. أنا ابعد الرجال عن المثالية .. لكني لست بأسوأهم .. حتى وإن أصررتِ على أني كذلك .. أدرك بأنكِ ترين بي وحشًا مسعورًا يفترس النساء ليرميهين بعد افتراسهن .. من دون أي إحساس بالذنب .. لكنني لست كذلك يا جمان .. لست إلا رجلاً .. رجلاً بكل ما في الرجال .. من مساوئ ومن مزايا .. رجلاً تملأه العيوب .. مثلما يتحلى بالكثير من المحاسن .. التي لا أعرف لماذا لا تبصرينها .. لا ببصركِ ولا حتى ببصيرتكِ ..”

كيرلس بهجت

kirolloc be\get

كيرلس بهجت

طبيب مهتم بالقراية والتدوين

اقرا كمان ل كيرلس بهجت