ليه بنزعل من النقد؟!

” النقد ” حاجة مؤلمة .. فيعني ايه حد يعيب في حاجة فيا او يوجه لي نصيحة ؟! فمين ده اصلا ؟!!
الموضوع بيبتدي من و أحنا صغيرين , لما بنسمع اول نقد في حياتنا من بابا او ماما .. و اللي غالبا بيكون مصحوب بصيغة غضب و اي شكل من اشكال التعنيف .. و اللي بيترجم في دماغنا ان ده مؤشر علي بداية كسر العلاقة الحلوة اللي بتربطنا باهلنا الـ attachment bond .. فساعتها بنحس أننا أقل من العادي و إن حياتنا و سعادتنا مهددة للاختلال .. فبيتكون عندنا إن الـ ” نقد ” ده حاجة وحشة ! و إن مجرد التعرض ليه مره تانية ممكن يخلينا نمر بنفس الأحاسيس السلبية ديه ..
واحدة واحدة نبتدي نكبر و شخصيتنا تطور و يختلف نظرة كل واحد فينا للـ ” نقد ” , فيظهر الـ Internalizer وده اللي بيتعب من اي صيغة للنقد, ويفضل يعذب في نفسه ويكون حينفجر  لو حد لمح له علي اي حاجة في شخصيته او حياته !! .. ويظهر برضة الـ Self-Convincer واللي ضيقه بالنقد بيخليه متضايق و مخنوق بس ده مش بيطلع في شكل ضيق من الذات قد ما هو هجوم على الأخر بشكل عنيف, فهو مهما كان في ايه هو مقتنع تماما باللي بيعمله , فالاخر مش بيفهم عشان بينقده ! … فيه الـ Defender واللي بيكون سلوكه مدافع بس في النطاق الطبيعي , يعني بيدافع عن شكله ووضعه بس حالته مش بتتعدي شكل الدفاع البسيط ده .. و فيه الـ Feedback Seeker اللي –إلى حد ما- بيتعامل مع النقد بشكل موضوعي وعملي وبيركز مع النقد كإشارة معينة عشان يتطور ويحسن من سلوكه ..
المشكلة إننا ساعات في حياتنا بنقابل ناس عشان عندنا شعور شديد بالنقص فبتعوضه بنقدها المستمر للي حواليها, فلو أنتا من الشخصيات اللي بتتعب وتتعصب من اي نقد حتلاقي حياتك بتتحول للجحيم, وعشان كدة من اشد علامات نضوج الشخصية هو تعاملها مع النقد بشكل عابر وسلس .. حد ما قال كلام ما فديه وجهة نظره هو حر فيها, ممكن تكون غلط وساعتها حتضرني في حاجة لو سمعتها وممكن تكون صح فتساعدني اني احسن من نفسي ..
في النهاية الإنسان اللي عنده امتلاء حقيقي بذاته مش بيفرق معاه مين قال ايه او مين اتكلم ازاي .. فنظرته لنفسه مش معتمدة علي شكل هش سطحي معتمد على اراء أو ادراكات اللي حواليه .. إنما نابع من إيمانه بمواطن قوته وصدق جوهره .. ويبقى زي ما قال عمنا “أحمد بهجت” في تفاحة آدم”:
“…إن القوة أن يعرف الإنسان ماذا يقال عنه ثم لا يهتم ,, أما الضعف فأن ينأى بنفسه عن كل نقد ويحسب انه قد أفلت من النقد…”

كيرلس بهجت

kirolloc be\get

كيرلس بهجت

طبيب مهتم بالقراية والتدوين

اقرا كمان ل كيرلس بهجت