ليه القومية المصرية ؟!

انطون ميلاد

يعني ايه قومية مصرية؟! وليه القومية المصرية؟!

اتكلمنا كتير – ولسة بنتكلم- عن ان الهوية المصرية هي الحل من الضياع اللي احنا فيه. ف الفلسفة اتعلمنا ان تعريف الشء لازم يكون جامع مانع بمعنى أنه يكون جامع لكل مفردات الشيء دا ومانع لأي حاجة غريبة او مختلفة عنه. وعشان ندي تعريف جامع مانع لمصر لازم تكون هي الهوية المصرية لأنها بتجمع كل فئات المصريين وكل تاريخ وثقافات مصر المختلفة بداية من حضارة المعادي والبداري لحد دلوقت ومانع لأي شيء تاني غير مصري.

لكن في بعد تاني ممكن اي حد قرا عن الحضارة المصرية القديمة وأزهى عصورها على الإطلاق. الهوية المصرية مش إننا بغني على الماضي اللي فات ولا إننا نكون متعصبين لنفسنا ضد الثقافات والقوميات التانية. الحضارة المصرية القديمة -60%  من تاريخ مصر-  اعتمدت على نقط مختلفة اعتقد هي الحل للخروج من الأزمة اللي احنا فيها، هتكلم فيها معاكو ولازم نلاحظ إن ترتيب الكلام عن المواضيع دي مش ترتيب لأولويتها لإن كل المواضيع دي مهمة بنفس الدرجة.

البحث العلمي: ف اكتر من مجال اكتشفنا ان مصر القديمة كان البحث العلمي من ضمن أولويتها، ومفيش مثل أوضح من بنى الأهرامات، اللي شفنا الإعجاز العلمي فيه ولحد دلوقت مش ادرين نفسر ازاي اجدادنا عملو المباني الضخمة دي بالتكنولوجيا البسيطة اللي كانت معاهم، دا غير عناصر البحث العلمي زي التجربة والمحاولة اللي هنشوفها ف مراحل تطور بنى الأهرامات من الهرم المدرج والهرم المنحنى لحد  هرم خوفو المعظم. الفنان اللي عمل لوجو الموقع أيسمه ماجد إبراهيم، بعد كذا تجربة ليه مع الفن المصري القديم اتكلم وقال ان الرموز المصرية القديمة كانت بتتعمل بمعايير هندسية مظبوطة وبشكل. مبهر. وف  كتاب أيمحتب إله الطب هنتكشف إن تشريح الجسم كان بيتم بشكل مستمر.

احترام المرأة: هنلاقي إن ف مصر القديمة كانت الست موجودة ف كل مناحي الحياة، كانت إلهة وملكة وطبيبة وقاضية وكان في تساوي مابينها وبين الراجل ف القوانين. وف صفحة فان بنات ازيس اللي بقت من أهم صفح الفان اللي بتتكلم عن حضارة مصر القديمة، هنلاقي إن حالات التحرش والمضايقات محصلتش ف مصر القديمة إلا بعد دخول الأسيويين مصر ف عهد الرعامسة.

حب الفن: مش متاج الموضوع أصلا أي كلام، الفن المصري العظيم موجود فكل تفاصيل حياة المصري القديم، وكفاية زيارة واحدة لأي مقبرة أو معبد أو زيارة للمتحف المصري عشان تكتشف دا.

التصالح مع الطبيعة: ودا عنصر تقريبا كان موجود ف كل الحضارات القديمة، تعالو نشوف نفسنا دلوقت، احنا عايشين ف بيوت خراسانية معزولة عن الطبيعة مبنشوفش منظر طبيعي إلا كل فين وفين. ولو بصينا على الحضارات القديمة هنلاقي أسطورة أطلانتيس اللي أجدادانا المصريين حكوها لسولون واللي فيها بتقول أن الحضارة دي اتدمرت بسبب أنها محققتش التوازن بينها وبين الطبيعة، أو بين النمو التكنولوجي والنمو الروحي، يعني عدم التوازن والتصالح مع الطبيعة كان نتيجه الدمار عند المصري القديم.

وف الاخر مش هقدر أول غير اننا ننادي باستعادة هوية مصر من خلال القومية المصرية هو إننا نتمسك بأمور حضارية وفكرية هتنقذنا من الضياع.

 

انطون ميلاد حنا

antwn milad

انطون ميلاد حنا

كاتب وباحث ... صدر له كتاب اللغة المصرية الحديثة - دراسة وصفية

اقرا كمان ل انطون ميلاد حنا