لا غول ولا حـاجـة

بسنت حسن سلامة

العلمانية ..

يانهار طين .. دى كلمة سمعتها وحشة

تمام زاي الست اللي ماشيها بطال

أو البنت مقصوفة الرقبة

حاضر يا سيدي عارفين

كمية الكراهية اللي بقت تاريخية ومتوارثة ومتراكمة ضد المصطلح ده

والفضل أكيد للي ناضلوا سنين عشان يزيفو الحقايق

طب وبعدين .. نعمل إيه بقى .. نسميها سوسن؟

نضحك عليك يعني ونمررها لك زي ما اتمررتلك مصطلحات تانية كتير بتلمع جابتك ورا

(الشريعة) اللي بقت بقدرة قادر الجزية وقطع ودن القبطي وحد الحرابة وحكم المفسدين في الأرض

(الإسلام هو الحل) .. يعني حضرتك تاكل وتلبس وتتعالج وتتعلم بكيس بلح زي بتاع فيلم كاراكون في الشارع أو على الطريقة العصرية تاخدلك كام علبة زيت على كام كيس سكر يا سكر وتعتبر أن اللي حصل لك ده تغير عظيم.

(الديمقراطية) .. يعني الصناديق وبس لكن صوت وغضبة الملايين في الشارع دي مش ديمقراطية ده شغب وتسيب وتمرد على النظام وكمان على الإسلام شخصيًا

يعني بالبلدي كده كفر وإلحاد والعياذ بالله.. ما لطفي السيد سقط في التاريخ غير البعيد لما طلعت عليه إشاعة إنه ولا مؤاخذة ديمقراطي..

دلوقتي بقى لو انت علماني متكسسفش .. فاحتمل ما لا تستطيع احتماله بدءًا بالتخوين والتكفير حتى الاتهام بنشر الأفكار الإلحادية الهدامة ومش بعيد عليك تهمة الفسق والفجور حتى الفعل الفاضح في الطريق العام.

تخيلوا كده لو مواطن شال يافطة مكتوب عليها مثلاً مثلاً يعني (أنا علماني إذًا أنا موجود) (أنا علماني إذًا أنا إنسان) (أنا علماني إذًا أنا مصري) (أنا علماني إذًا أنا مسلم)..

إيه اللي ممكن يتعمل فيه ومعاه.

كل ده بسبب اللي شربونا آراء معلبة وحقنونا تحت الجلد بسم مضاد لكل ما هو حضاري ومتمدين.

تعرف إيه حضرتك عن العلمانية غير يمكن اللي قاله أردوغان إن تركيا دولة علمانية وإن العلمانية هي الوقوف على مسافة متساوية من الأديان وإنها في الشرق تختلف عن مفهومها في الغرب.

حضرتك خايف وقلقان ومتوجس من المصطلح كده ليه

مرعوب ومتوتر وكاره ورافض

واحد حيقول لي أنا غيور على ديني.. وخايف على الإسلام لحسن يتبخر أو يتلاشى وكأن الإسلام مش بس هش قوي كده لأ ده زي شوية مية حيخلصوا أو يتبخروا.

مسلمين عاشوا حياتهم كلها في بلاد علمانية وفضلوا يمارسو طقوسهم وشعائرهم ومش كده وبس العلمانية حمتهم ومدنتهم أكتر بكتير من بلدانهم اللي عاملة زي بطرمان العسل اللي حضرتك بتغوص فيه وإيدك تتعاص منه وتبقى إنت شخصيًا كائن ملزق.

واحد تاني حيسأل وانتوا مالكم متبتين في المصطلح ده كدا ليه ..

ببساطة زي تمام إننا مطلبناش من حضرتك تغير اسمك أو اسم عائلتك أو اسم الشارع اللي أنت ساكن فيه أو اسم الست اللي خلفتك أو البنت اللي حبتها زمان أو حتى اسم قريتك أو بلدك أو اسم الدلع اللي كنت بتتنادى بيه وانت صغير..

هي كده يا سيدي .. ربنا خلقها كده .. اسمها  (العلمانية)

غير حضرتك كرهك المجاني للمصطلح من غير ما تفهم معناه ولا حتى تبعاته ..

ولو معرفتش .. اشتري مرهم ضد الحكة أو الأرتيكاريا اللي بتصيبك أول ما تسمع كلمة (علمانية) وتبتدي تهرش..

عالج جلدك بأشعة الليزر عشان تحميك من الفسافيس اللي بتظهر على سطحه أول ما تقرا كلمة (علمانية) …

إلبس حفاظات إن استطعت .. تحميك من أعراض التبول اللإرادي لما تسمع حاجة من الفكر العلماني اللي بيحمي حقوقك كمواطن وإنسان.

حتقولي إيه التعالي ده .. حرد على حضرتك وأقولك وهو فيه تعالي أكتر من رفضك لبني آدمين ورؤى وأفكار ومكتسبات حضارية عمرها سنين لمجرد أن عندك حساسية وكره مجاني لمصطلح بتجهل معناه.

طب والحل ..

ببساطة خليك فخور وغيور على دينك ما شئت وما استطعت

وخلي غيرك كمان فخور وغيور على مكتسبات الحضارة الإنسانية اللي عمرها من عمر الحجارة اللي مالية دور العبادة واللي مالية كمان حيطان بيت جدك

سيب الخلق للخالق .. سيب الأفكار تتطير … تغدو خماصًا وتعود بطانًا (تروح فاضية وترجع مليانة).

سيب من اللى عايز يحلق يحلق .. يمكن يوصل أو يا سيدي يحصل ابن فرناس

سيب السمان في حاله ما السما مليانة حدادي وصقور .. يعني جت ع العلمانية

سيب الجمال والطبيعة اللي مش حتبطل دلع .. وتكبر وتلعلع

حتقول لي وإيه دخل كل اللي بتتكلمي عنه ده في العلمانية.. دي نقرة ودي نقرة

حقول لك لا يا صاحبي .. هي نفس النقرة والدحديرة اللي دحدرتنا وراها وجواها سنين من غير ما نعرف إننا بنحارب خلاصنا وبنموت أجمل ما فينا وبنحرق كمان مراكبنا اللي ممكن وتنجينا.. وكل ده طبعن بجهل استثنائي وبعشق عجيب للأصولية وما ألفناه أو جعلونا نألفه وهو لا يؤلف أصلاً وضد نظرية الألفة من أساسها.

حتقول لي طب ما تحكي لنا يا أم العريف عن العلمانية كده شوية.. يالله سمعينا أحلى كلام

حقول لك لو أنا من أنصار الضحك على الدقون كنت عملتلك فيها (الداعية).

ولو أنا من بتوع شعبي أهلي وناسي حبايبي أنا واحدة منكم كنت رشحت نفسي في أي حتى من اللي بيترشحوا فيها اللي بيترشحوا.

ولو أنا من أنصار السحر والشعوذة كنت عملتلكم على فضائية خاصة برنامج (سحر العلمانية)

ببساطة مش حدي لحضرتك حقنة تحت الجلد ولا في العضل.. إختشي ..

ولا حديك أكيد علبة تشربها وأقولك بالشفا..

ذاكرلك حبتين يمكن ينفعوك

بس الأكيد إني بطمنك وأقولك أن العلمانية تلاتة بالله العظيم تلاتة

لا غول ولا حاجة….

بسنت سلامة

pacant calama

بسنت سلامة

اعلامية وناقدة سنمائية