لاف وإن لاف

في فرق كبير بين love و in love ،،،
الموضوع بيبتدي لما لأول مرة تشوف حد وتعجب بيه و تعدي بكام مرحلة كده وأخيرا تقرر تحبه، هنا انتا بتحب فعلا Loving Someone وساعتها الموضوع يبقي بالنسبة لك مشاعر جميلة جدا صادرة من ناحيتك للشخص ده ويبقي كل طموحك أنه يحس بالمشاعر ديه ويستقبلها منك واللي لو حصلت الخطوة ديه تبقي In Love، فهنا في مشاعر متبادلة بينكوا انتوا الاتنين زي حالة من الرومانسية بتجمعكوا وانتوا موجودين فيها ” In “..
لغاية كده الاتنين في الحب مع بعض In Love بس ممكن يحصل حاجة تعمل مشكلة … هنا نرجع تاني للنقطة الأولي للحب المجرد أو فكرة Loving Someone, فمش معني إن الحالة اللي بينكوا حصل فيها خلل إن خلاص بقي كل المشاعر الجميلة الرائعة تنتهي , إنما الخلل في الاستقبال بس أما وجود المشاعر بنفسها فهو لسة موجود بغض النظر عن أي حاجة .. و من هنا جت نظرية ” اللي بيحب حد مش بيعرف يكرهه ” فحتى و لو مش In Love معاه ، فهو بيـLoveـه.

حاجة مهمة تانية .. في حب الشخص Loving Someone ، سلوك الحب اللي بتقدمه بيكون مرهون عليك انتا بس, يعني أفكارك, شخصيتك, طموحاتك و ادراكاتك .. كل حاجة فيك هي اللي بتشكل التعبير عن الحب, فمثلا لو انتا خجول حيبقى حبك كده, لو متهور برضه حبك حيبقى كده .. أما في الـ In Love لا ديه حالة جمعتكوا انتوا الاتنين وعلى أساسها شكل الحب بيتغير, يعني لو شريكك في صفة معينة حتلاقيها طابعة على شكل الحب ده, فلو مثلا انتا بتتكلم كتير وشريكك العكس, حتلاقي شكل حبكوا مش شرط يعبر عنك بشكل واضح … فممكن توصل انك تلاقي نفسك في حالة حب مش بتعبر عنك خالص !! … و ده اللي بيخليك بتحب الشخص بس مش عارف تمارس معاه مشاعر الحب ديه !!
في النهاية، الشخص الذكي هو اللي يعرف يدرك هو واقف فين في علاقته مع أي حد، لإن الفروق الصغيرة ديه هي اللي بتبين الشخص اللي بيحب وبس عن الشخص اللي بيحب وفاهم يعني ايه حب .. بتبين الشخص اللي مندفع ورا مشاعره وخلاص عن الشخص اللي بيبذل مجهود إضافي عشان يبلور مشاعره بأكتر من طريقة ناضجة ومناسبة، والأهم … انها بتبين الشخص اللي سامع عن الحب وعاوز يجربه من الشخص اللي مستعد يخوض الحب كرحلة حياة بس بيدور على الشريك اللي يستحق يشاركه الرحلة ..

كيرلس بهجت

kirolloc be\get

كيرلس بهجت

طبيب مهتم بالقراية والتدوين

اقرا كمان ل كيرلس بهجت