كَترة الانتِظار تعِدم الرَغْبة

اتنين بيتعرفوا على بعض من خلال الـ facebook مثلا وبيتكلموا مع بعض ويحبوا بعض! أو اتنين يتعرفوا على بعض في العالم الواقعي بس علاقتهم تزدهر و تتطور من خلال الـ social media فتبقى العلاقة موجودة بالرغم إن الاتنين في أماكن بعيدة عن بعض تحت مسمي الـ Long-Distance Relationships أو الـ LDRs أو العلاقات بعيدة المدى, واللي ظهرت بقوة في الفترة الأخيرة بسبب تعدد وسائل التواصل الافتراضية.

نظريًا, التعارف أو الكلام ممكن يكون بدايته أي مكان, سواء شارع, قهوة, محطة مترو, أو حتى رسالة على الـ facebook , بس عشان تأسس لعلاقة حقيقية من خلال عالم افتراضي بيبقي الموضوع صعب شوية أو ساعات مستحيل! .. لكن الدراسات بتقول غير كدة ..!! ففي مقالة بتكلم عن الـ LDRs على موقع mentalfloss جايبة شوية دراسات بتثبت إن الـ LDRs مش وحش زي ما ناس كتير متخيلة أو انه هادم لأي علاقة, لأ ده ساعات بيكون كويس وبيقوي العلاقة بين الطرفين بشكل أعمق وخصوصًا إن الاتنين بيكون في افتقاد فظيع ما بينهم وجواهم لهفة عشان يشوفوا بعض بجد! … فهما في حالة شوق مستمر انهم يبقوا مع بعض ..

بس القضية إن العلاقة الضعيفة بتقع سواء المسافة قريبة أو بعيدة, فلو اللي بينهم مزيف حيوقع ولو عايشين مع بعض .. لكن اللي بينهم لو قوي حيعيش حتى لو الاتنين من كواكب مختلفة! … وساعتها مش حيفرق هو موجود فين أو هي فين … إنما المسافة حتبقى مجرد حاجز أهبل عشان يتواصلوا مع بعض … فصحيح طول المدة أو طول المسافة هو قاتل لأي رغبة عابرة أو نزوة مؤقتة .. بس الحب الصادق مش بيتأثر بالحاجات ديه كلها .. فلو فرقتهم السنين .. لو بعدتهم الأماكن .. لو وقفت كل الظروف والأحوال في طريقهم, حبهم أو رباطهم الروحي حيكون أقوى من كل الحاجات دية ..

ففي النهاية, مش المقصود أبدًا إن الناس تبطل تتقابل في الحقيقة أو يفقدوا قيمة التواصل المادي بينهم, لكن لو الظروف اللي جمعتهم كانت صعبة أو غير عادلة ساعتها بيكون الـ LDRs هو الشكل الوحيد للعلاقة واللي بعتبر من أقوى الاختبارات لمعدن أي حب … فساعتها بيظهر اللي كان بينهم رغبة .. ولا اللي كان بينهم حياة ..

كيرلس بهجت

kirolloc be\get

كيرلس بهجت

طبيب مهتم بالقراية والتدوين

اقرا كمان ل كيرلس بهجت