عن الـ make out وأهمية التقبيل

لو معلوماتك عن الإنجليزي بتعرفها من الأفلام الأمريكاني هتعرف على طول إن كلمة make out معناها “تبادل القُبَل” أو “التقبيل”.

ف اللغة اتعودت ان مفيش حاجة اعتباطي، فحتى لو احنا بشكل ظاهري مش واعيين بدا، فعقلنا الباطن ووعينا الجمعي بيتدخل بشكل من الأشكال فنحت واشتقاق أي كلمة جديدة. وعشان كده تحليل أي كلمة وفهم فلسفة اشتقاقها ونحتها بيخلينا نفهم اللي ورا الكلمة وموقفنا من الشيء اللي بتعبر عنه.

يعني ايه make out ؟

مبدئيًا كلمة make حسب قاموس أكسفورد the oxford English dictionary of current usage هنلاقي إن معناها صَنّع، كَوّن، شكّل، ركّب، أنشأ، عّمِل. اما كلمة make out –فبحسب نفس القاموس- هنلاقيها بتدي معاني تبين أو أبصر من بُعد (يعني تواصل وتقريب من بعد)، تمكن من قراءة خط غير واضح (تفسير وتوضيح)، فهم مضمون الكلمة (فهم وتفسير واستيعاب)، أعد قائمة (تفصيل).

ولما نرجع لقاموس أشهر الأفعال المركبة، إنجليزي – عربي، إعداد أمير العزب، من مجموعة الألف كتاب، هنلاقي، بالإضافة للمعاني المذكورة ف قاموس أكسفورد، معاني: يكتشف أو يفهم المعنى (تفسير)، يثبت أو يبرهن، يتم، يكمل، يرسم أو يصف بتفاصيل، يميز، ينجح.

وف موقع dictionary.com هنلاقي تفسير أكبر، فهنلاقيه بيقول إنها بتدي معاني: التمييز والإدراك، الفهم, محاولة تأسيس أو إثبات، يتظاهر, يدير.

تبادل القبل

طب ايه اللي جاب القلعة جمب البحر؟!

موقع سكسولوجي -وهو منصة بتقدم محتوى بالعربي عن الجنس وكل شيء متعلق بيه- كتب عن مواقع أجنبية إن الإنسان بيتواصل مع الطرف الآخر عن طريق الشم والتذوق واللمس، ولوحظ إن إفراز الاكسيتوسين Oxytocin بيزيد بعد ملامسة الطرفين، واللي هو معروف باسم هرمون السعادة، ودا بيحسن العلاقة العاطفية بين الشريكين. وبيقول كمان ف مقالات تانية إن التقبيل مقدمة لعلاقة جنسية صحيحة، واللي هو –بدوره- بيزيد الألفة بين الطرفين، وبيرجع دا لنفس السبب اللي فات وهو إفراز الاكسيتوسين. الموقع برضه أكد على أن القبلات أساسية فى تبادل العاطفة بين البشر وكسر الملل الشعوري مابينهم، أداة جميلة طورتها البشرية للتعبير عن الحب.

الزتونة

طيب نرجع بقى للمصطلح make out، هنلاقي إن المصطلح بيتكون من make اللي بتدي معاني التكوين، و out اللي بتدي معنى الخروج، يعني المصطلح بشكل عام بيتكلم عن تكوين رؤية أو مشهد (زي ف قراءة خط غير واضح، وفهم مضمون، ويكتشف أو يفهم المعنى، وتبين أو أبصر من بُعد)، أو تفسير (زي أعد قائمة)، أو خلق وتأسيس شيء (زي محاولة تأسيس أو إثبات، يتظاهر, يدير). إذن القصة كلها ليها علاقة بتكوين شيء وتحويله لشيء واضح ومفسر ومفصل، وهو دا بيت القصيد. الـ make out زي ما بيوصفه موقع urban dictionary هو عبارة عن قبلات فرنسية French kiss (في مواقع بتسميها القبلة اللسانية أو tongue kiss) مع مداعبات. القبلة الفرنسية، هي أكتر قبلة بتعبر عن الرومانسية والشغف وبيكون بأن كل طرف بيدخل لسانه جوا بوء شريكه –خلال القبلة- ويتحرك جواه، وهنا بنلاقي عملية مزدوجة للتلامس والتذوق: هي التلامس من خلال الشفايف، ومن خلال اللسان كمان.

كمان هنلاقي المداعبات عنصر من عناصر الـ make out، وهي عبارة عن ملامسة جسد الشريك سواء بالإيد أو بالشفايف أو باللسان، وفي مواقع كتير بتسمي الممارسة دي بـ”اكتشاف” الشريك، اللي ممكن نقول عليها بشكل تاني تفسير وتوضيح وتفصيل كل طرف عند الاخر.

وهنا هنلاقي إن الـ make out بيزود عنصر التلامس والتذوق –اللي هم عناصر أساسية في التواصل مع الشريك- إلى تلات أضعاف ودا معناه زيادة التواصل، أو بصيغة تانية تكوين رؤية خارجية عند الاخر عني، وتكوين رؤية عن الآخر عندي، وهو يتضمن تفسير وتوضيح وتفصيل كل طرف عند الآخر، وبكده تبان الفجوة الرئيسية بين معاني الكلمة، وتبان الفكرة الرئيسية والهدف من الـ make out.

ومن اللي فات دا كله نفهم إن الـ make out مش مجرد اداة للمتعة، أو بداية للمارسة الجنسية الصحيحة، لكنها شيء حيوي من أجل تكوين وتوضيح وتفسير وتأصيل العلاقة.

انطون ميلاد حنا

antwn milad

انطون ميلاد حنا

كاتب وباحث ... صدر له كتاب اللغة المصرية الحديثة - دراسة وصفية

اقرا كمان ل انطون ميلاد حنا