عاشقين

أحنا هنا قصاد لوحتين , اللوحة اللي علي الشمال أسمها LOVERS AND LAUTREC للفنان Joseph Lorusso و ديه عبارة عن عاشقين ماسكين أيد بعض و بيتفرجوا علي لوحة للفنان العالمي Toulouse-Lautrec بعنوان In Bed: The Kiss ( في السرير : القُبلة ) , اللي هي نفسها اللوحة اللي علي اليمين

عشان نفهم اللوحة Joseph Lorusso لازم الأول نفهم ظروف لوحة Lautrec … من الوهلة الأولي ممكن الواحد يتخيل أنها لراجل و ست في سرير بيبوسوا بعض لكن الحقيقة هي لستات بيبسوا بعض في علاقة عاطفية مثلية بينهم !! .. بغض النظر عن توافقك مع الفكرة او أعتراضك عليها , فالفنان Lautrec رسم اللوحة ديه عشان يجسد فكرة المشاعر اللي بتحارب القيود المجتمعية و الدينية في الوقت ده و بالرغم من كدة المشاعر كانت بالقوة اللي تسمح لحامليها أنها يشاركوا بعض لحظة الحب ديه ..

تمر السنين و بعد أكتر من 100 سنة , يجي Joseph Lorusso و يرسم لوحة لاتنين عاشقين واقفين في منظر خالي تمام من اي مثيرات جنسية , أنما مجرد بيستمعوا بلوحة Lautrec في هدوء و سلام و برضة مشاعرهم جمعتهم عشان يتشاركوا لحظة الحب ديه ,, .. فـ Joseph Lorusso – في وجهة نظري الشخصية – قدر يجسد معني التشارك اللحظي بين الحبيبين أقوي من Lautrec نفسه !! .. فهي واقفة ساندة راسها علي كتف حبيبها .. و هو ساند راسه عليها و كأنها بيحضنها براسه ! .. أيدهم مش مجرد ماسكة بعض , لا ده داخلة جوا بعض بشكل متلاحم .. سرحانين في اللوحة بنفس الفكر , بنفس الأدراك , بنفس الروح .. لحظة ترابط و تواصل في غاية الجمال , يمكن من أروع الأعمال الفنية اللي عبرت عن فكرة لحظة مشاركة الحب .. في أول حاجة جت في دماغي لما شفت لوحة Joseph Lorusso , هي جملة المفكر الرقيق ” جان فانييه ” :(( .. الحب ليس القيام بأشياء خارقة للعادة ، بطولية .. إنما الحب هو ممارسة الأشياء الاعتيادية بحنان… ))

في النهاية , أستمتعوا باللوحتين و أنتوا بتسمعوا Nuit Obelaetis للساحر Karim Baggili :

 

كيرلس بهجت

kirolloc be\get

كيرلس بهجت

طبيب مهتم بالقراية والتدوين

اقرا كمان ل كيرلس بهجت