بين الكبت والقهر

الكاتب الروسي ” Andrei Tarkovsky ” في فيلمه Nostalgia – 1983 كان بيقول: ( Unspoken feelings are unforgettable) بمعني (المشاعر الغير مصرح بيها غير قابلة للنسيان) …

مبدئيا لازم نفرق بين الكبت Repression والقمع Suppression, فالكبت عملية لا إرادية يعني أنا غصب عني عقلي نسي حادثة معينة, أما القمع أنا بإرادتي دفعت عقلي أنه ينسي حادثة معينة .. بس هل فكرة النسيان سواء عن قمع أو كبت هي فكرة نهائية؟؟؟

العقل الإنساني بيتعامل مع الحوادث الحياتية أو الذكريات سواء مواقف أو مشاعر بشكل أشد تعقيدا مما نتخيل, فالموضوع مش عبارة عن سلة مهملات رمينا فيها الذكري أو الشعور اللي مش عاوزينه فخلاص كده حينتهي من الوجود, إنما ده عالم كبير أسمه اللاوعي لغاية وقتنا ده علماء النفس مش عارفين يوصلوا لكل مداخله .. بس اللي فيه إجماع عليه إنه بالرغم من تعقيد وضبابية اللاوعي إلا انه المسيطر الأكبر وهو المحرك الرئيسي لسلوك الإنسان من خلال الـ cognitive load أو المجهود المعرفي، فشعورك اللي انتا عاوز تنساه بأي شكل أو الذكرى اللي انتا نازل تضغط عليها عشان تختفي من مخك بتطلع عليك بتأثير أقوى من الأول وتبان في شخصيتك وأفكارك حتى ولو انتا مش واخد بالك ..

فالكلمة اللي انتا مكانتش عاوز تقولها حتفضل تطاردك, والقرار اللي ماكنتش عاوز تاخده حيفضل يعكنن عليك حياتك, والشعور اللي انتا مردتش تصرح بيه حيكون زي علامة في كل خطوة تفكر فيها في حياتك! .. فبمجرد نزول أي حاجة لطبقة اللاوعي تأكد إنها حتكون اعنف واشرس من الأول .. وعشان كده القمع المستمر للمشاعر والأفكار عمره ما كان حل جذري، إنما مجرد مخدر مؤقت بيسبب أثار سلبية كتير في حياة الإنسان ده ..

ففي النهاية فرويد بيقول: ( Unexpressed emotions will never die. They are buried alive and will come forth later in uglier ways ) .. فالمشاعر الغير معلنة عمرها ما بتموت إنما بتتدفن حية وترجع للظهور تاني في أشكال أقبح ..!

كيرلس بهجت

kirolloc be\get

كيرلس بهجت

طبيب مهتم بالقراية والتدوين

اقرا كمان ل كيرلس بهجت