بين الغزل والتحرش

مش كل كلمة حلوة تتقال للبنت يبقي المقصود بيها Harassment “التحرش” … أو على الناحية أي مجاملة تتقال لها وتضايقها هي المفروض تقبلها و تعدي عشان هي Flirting “الغزل” .. ففي فرق كبير بين الاتنين ،،،،

ناس كتير بتحصر الفرق اللي بين الـ Flirting و الـ Harassment في اللغة المستخدمة ،،، يعني لو اللغة المستخدمة بعيدة عن اي موصفات جسدانية للبنت يبقي عادي ده مش تحرش وعلى العكس أي إشارة عن شكل أو مظهر خارجي يبقي على طول تحرش.

الحقيقة إن الموضوع مش بالظبط كدة !! مثل بسيط ، لفظ زي “مزة” واللي يعتبر عندنا في المجتمع لفظ لمدح الصفات الخارجية للأنثى ممكن يتقال لنفس البنت من صديقة ليها او حتى صديق مقرب جدًا هي تعتبره Flirting إنما لو اتقال لها من شخص غريب مفيش اي رابط سابق اكيد حتعتبره تحرش ..! .. فالفرق الاساسي هو الغرض من إبداء الإعجاب ..

في الـ Flirting “الغزل” انتا بتمدح الأنثى عشان انتا عاوز تبين لها قد ايه هي جميله في عينك من غير اي عائد او مردود ليك، فمدحك مش عشان عاوز منها حاجة في المقابل .. أنما في الـ Harassment “التحرش” انتا غرضك منفعة لنفسك سواء كانت معنوية او حتي جسدية ! فانتا بتقول إعجابك ومستني حاجة! .. وهو ده أصل الوضاعة في فعل التحرش، انك بتوصل للبنت انك ممكن تشتري رائيها او وجهة نظرها ناحيتك سواء بسلوكيات رخصية او كلام مبتذل ..

نقطة مهمة تانية وهي ان الـ Flirting في حد ذاته ممكن يبقي تحرش لو البنت نفسها مش متقبلاه .. و لو حتي بتقول لها “انتي روحك قمة في النقاء”، وديه جملة بعيدة تماما عن اي غرض جسداني .. بس هي مش عاوزه تسمع رأيك، فهي حرة !! .. اه في ساعات بنات بتبقى حساسة اوي في النقطة ديه وتصدق اي كلمة حلوة او تدرجها علطول انها تحرش بدون اي لحظة تفكير .. بس في النهاية ديه قصتهم هما احرار في تلقي الاعجاب او رفضه …

في النهاية في حكمة بتقول الناس مش بتفتكر الكلام اللي قلته لهم قد ما عمرهم ما بينسوا الاحساس اللي خلتهم يمروا بيه .. فبرضه الست مش بيفرق معاها الكلمة كمدلول لفظي قد ما الاحساس اللي مرت بيه من تأثير الكلمة دية .. ويمكن عشان كدة اهم حاجة الصدق في الكلام اكتر من اختيار اللفظ !

فقولها كلامك اللي جواك بطريقتك اللي انتا مكسوف او قلقان منها بدل ما تقولها كلام نزار قباني وانتا ضحل وجاف في مشاعرك .. فياما بنات كتير بتتسحر بكلام بسيط وسهل علي كلام شعر وعميق ..والسر بيبقي في تصديق الشخص للكلام ده و إيمانه بكل حرف فيه .. ايمانه بقوة تمنيه لخلق جسر نفسي ووجداني بينهم .. ايمانه بقوة الحب .. .

كيرلس بهجت

kirolloc be\get

كيرلس بهجت

طبيب مهتم بالقراية والتدوين

اقرا كمان ل كيرلس بهجت