بمناسبة اليوم العالمي للغة العربية.. شوية حاجات كده

من شوية صغيرين مر يوم اللغة العربية، وهو دا اليوم اللي حددته الأمم المتحدة للاحتفال بواحدة من اللغات الرئيسية في العالم “على حد كلامهم” وبالمناسبة دي لازم نفتكر شوية حاجات:

اللغة العربية هي لغة دخيلة على شعبنا، معظم أجدادنا كانوا جهلة باللغة العربية لحد القرن العاشر، لما الكنيسة قررت انها تبدأ ف ترجمة النصوص الدينية المسيحية للغة العربية.

اللغة العربية كلغة العرب “شعب شبه الجزيرة العربية” كانت لغة مفهومة وواضحة فمكانش عندهم مشكلة ف قراءة اللغة العربية، لدرجة انهم كانوا بيقروا الكتابة العربي من غير تشكيل أو حتى نقط، لكن شعبنا المصري، لحد دلوقت مش قادر يتفاعل مع اللغة العربية بشكل سليم، لدرجة إن بعد 14 قرن من الاحتلال العربي إلا إن شعبنا المصري مش قادر ينطق او يكتب العربي كويس لدرجة إن وزارة التربية والتعليم تحط مادة اسمها القراءية مخصصة بس لتعليم القراية.

المؤرخين اختلفوا حوالين نهاية اللغة القبطية، في مؤرخين قالوا انها القرن الستاشر شاف اخر اتنين بيتكلمو قبطي، وناس تانية قالت ان ف القرن التمنتاشر كان في ناس بتتكلم قبطي. وبالرغم من كلام المؤرخين، هنلاقي ناس ف اكتر من منقطة ف الصعيد بتتكلم قبطي، لدرجة ان ف قرية اسمها نزلة عبيد ف المنيا الناس فيها كاتبين يفط محلاتهم بالقبطي، ودا معناه ان الناس هناك كلهم عندهم دارية باللغة القبطي. دا غير ان النوبيين ف أسوان، اللي عددهم بالملايين، لسة بيتكلمو نوبي. ونفس الكلام بالنسبة للأمازيغ.

لان اللغة العربية مش لغة مفهومة لشعبنا، وبسبب الضغط النفسي والحكومي اللي عملوه المحتلين العرب، ظهرت لغة وسيطة احنا بنسميها اللغة المصرية الحديثة لكن الحكومة مصرة تسميها العامية المصرية، والباحثين الاجانب بيسموها Egyptian Arabic .

ناس كتير اهتموا باللغة المصرية الحديثة، منهم ويليام ويلكوكس المهندس البريطاني اللي الف بيها كتب، هنلاقي برضه مصطفى مشرفة اللي ألف رواية وسماها “قنطرة الذي كفر” ولويس عوض اللي كتب رواية وسماها “مذكرات طالب بعثة”، دا غير طبعا بيرم التونسي وصلاح جاهين وعبد الرحمن الأبنودي.

اللغة العربية اعتبرت من اللغات الرئيسية لانها منتشرة ف مناطق واسعة، ودا حصل بحد السيف وبالعنف زي ماشفنا الغزوات  اللي قاموا بيها العرب ف آسيا وأفريقيا وأوروبا، ف الوقت اللي اللغة المصرية القديمة اللي اجدادنا اعتبروها لغة مقدسة، وبالتالي مينفعش غير المصريين يتعلموها، كانت منتشرة ف العالم كله، ودا اللي اثبته الدكتور رامي سمير فرج مينا، لما اثبت ان في كلمات مصرية قديمة بالالاف ف اللغات العربية واليونانية واللاتينية والانجليزية والفرنسية والايطالية والاسبانية وكلمات –اقل من عشرين كلمة- ف اللغة اليابانية.

انطون ميلاد حنا

antwn milad

انطون ميلاد حنا

كاتب وباحث ... صدر له كتاب اللغة المصرية الحديثة - دراسة وصفية

اقرا كمان ل انطون ميلاد حنا