النوبي والقبطي والفرعوني

من يومين كان السيسي ف أسوان وهناك قال إن النوبيين حوالي 200 ألف، بالرغم انهم حوالي 5 مليون، طبعًا هنا أنا كمسيحي كان لازم افتكر لما كان أعضاء جماعة الإخوان بيقولوا إن المسيحيين حوالي 6% من تعداد شعب مصر بالرغم من التعداد الرسمي بيقول إن المسيحيين 10%.

خدوا بالكو من التشابه، الموضوع مش مختلف ومش بعيد، هم بيخدوا نفس سكة المستعمر العربي اياها، التفرقة بين أشقاء الوطن الواحد والتقليل منهم عشان ميعرفوش ياخدوا حقوقهم. انا قلت إن التعداد الرسمي 10% يعني حوالي 9 مليون، في حين ان تعداد الكنيسة بيقول إن المسيحيين حوالي 15 مليون، تقولولي أصدق مين، أقولكو من غير مناقشة، الكنيسة طبعًا، مش تطرف والله، الحكومة عملت اللي عليها والله وعلمتني ازاي مثقش فيها من ايام حوادث السبعينات الطائفية وازاي الحكومة بتطرمخ عليها، والحوادث الطائفية اللي الحكومة طرمخت عليها ف عهد مبارك، وطبعا واضح ازاي الدنيا متغيرتش بدليل إن بدين لحد دلوقت متحاكمش بسبب المجزرة اللي عملها رجالته ف ماسبيرو. طبعا مننساش إن التعداد ف مصر بيتعمل كل فين وفين، ف حين ان التعداد بيتم ف الكنيسة بشكل سنوي عشان تنسيق العمل التطوعي جوه الكنيسة “الخدمة”، دا غير إن موظفين الحكومة ف معظم الأحوال بيتعاملوا بمنطق “على قد فلوسك ياخويا”، والمواطنين بيتعاملوا معاهم بشك وريبة، فايه بقى اللي يخليني اصدق الحكومة اللي وأكدب الكنيسة!!!

القصة واضحة بس مش عارف ليه الناس مبتاخدش بالها من الموضوع، إحنا كلنا ف مركب واحدة كلنا بيتم تدمير ثقافتنا وحضارتنا، وسكوتنا، وعدم تضماننا مع بعض هنموت كلنا. زمان الملك كرياكوس ملك النوبة، ثار لما عبد الملك بن مروان اعتقل وعذّب البابا خائيل، وقدر جلالة الملك كرياكوس يحرر وجه قبلي بالكامل ويحاصر قصر بابليون (طبيعي لازم أقول يحرر، كرياكوس نوبي والنوبيين أهلنا لكن عبد الملك بن مروان عربي يعني أجنبي)، لكن البابا خائيل –بطلب من عبد الملك بن مروان- قدر يقنع جلالته بأنه يمشي، وطبعا لو كان جلالته استمر كان ممكن تكون نهاية الاحتلال العربي لمصر، لكن خيانة خائيل وتواطئه مع المحتل العربي خذلتنا كلنا.

لو لاحظتوا إن احتلال العرب للنوبة جه بعد فترة طويلة من احتلالهم لمصر، وإن احتلال الوجه القبلي تم بعد احتلال الوجه البحري بسنين طويلة وبصعوبة أكبر، ودا واضح ف إن اللغة القبطية لسة عايشة ف قرى ف وجه قبلي لكنها انقرضت تماما من وجه بحري، ودا كان نتيجته كمان إن النوبيين لسة محتفظين بلغتهم جوا أراضيهم ونفس القصة ف البجا اللي ف السودان لكن البجا اللي ف مصر لغتهم ماتت، ونفس القصة بالنسبة للنوبيين اللي اتولدوا وعاشوا ف القاهرة أو الإسكندرية.

لو جمعنا الصورة كاملة هنفهم إن وجودنا معتمد على بعض، وهنفهم ازاي إننا لو وقفنا ف وش الاحتلال العربي بس هيكون نتيجتنا الانقراض، لازم نقف ونتكاتف. يانوبيين انتو أيام الباطلمة وأيام العرب حاولتوا تحرروا مصر، وف حرب 73 لغتكم كانت سبب من أسباب نصرنا. انتو جزء من مصر اينعم انتو ممكن تكونوا عرق مختلف وتكوينكو الحضاري مختلف نسبيا عن الحضارة المصرية الفرعونية، لكن انتو جزء مننا زي ما احنا جزء منكو، ضياع جزء مننا معناه ضياع الجزء التاني، مش كلام رومانسي ولا حاجة، راجعوا التاريخ عشان تعرفوا دا. دكتورة إيطالية متخصصة ف تاريخ النوبة القديم أسمها ماريا جاتو Maria Carmila Gatto أكدت لي إن النوبيين غير المصريين لكن الاختراع أو الفكرة اللي بتطلق ف مصر بتتنقل تاني يوم للنوبة، والاختراع أو الفكرة اللي بتطلع ف النوبة بتتنقل تاني يوم لمصر، ودا ملخص القصة، احنا الاتنين جزء من بعض ولازم نفضل مع بعض ولازم نحارب سوا، ثقافيًا وفكريًا وقانونيًا واجتماعيًا، عشان ناخد حقوقنا ونبرز نفسنا. الكلام دا بقولوا للمصريين برضه مينفعش ننسى النوبيين او نتعامل معاهم بتاعلي، هم مش أقل مننا هم ليهم ف مصر زي مالينا، وهم بنوا ف حضارتنا زي ما احنا بنينا فيها. وفنس الكلام هقوله للأمازيغ والبجا، احنا كلنا واحد، شيء جميل إن يكون لينا خصوصية، وشيء جميل إننا نفتخر بيها، بس مش جميل إن الخصوصية دي تفرقنا، لازم نأكد على هويتنا وعلى خصوصيتنا، بس كلنا اتولدنا ف مصر وكلنا جزء منها، وكلنا أثرنا ف بعض، ولازم نعترف بدا ونقبله ونحترمهن ولازم كلنا نساعد بعض عشان نعبر عن نفسنا ونتخلص من الفكر الأحادي اللي بيطاردنا.

يا مسيحيين مصر، انتو اكتر ناس بتعتز بكلمة قبطي، انا قابلت نوبيين كتير، وقريت كتير عن الحضارة النوبية ولاحظت ازاي إن الحضارة القبطية كانت رئيسي فيها، ولاحظت ازاي النوبيين مهتمين ومقدرين لدا. لازم تكونوا جنب اخواتكم النوبيين لان دا الطبيعي. انغلاقكم يا مسيحيين مصر هيكون نتيجة لدمار مصر الكاملة، البابا مش هو المسيح هو شخص عادي ممكن يغلط وممكن يكون صح، البابا ف الآخر هيموت لكن مصر هي اللي بقيالنا، ادينا شوفنا خيانة خائيل لمصر، لكن النوبي هو اللي وقف عشانها، سواء أيام المحتل عبد الملك بن مروان أو أيام المحتل صلاح الدين الكردي أو غيرهم. ولازم نحدد احنا مين وعاوزين ايه، لو انتو عاوزين مصر، لازم تقفوا مع المصريين الحقيقيين، سواء نوبيين أو ناس مهتمة بشكل حقيقي بالهوية المصرية، لكن لو مش مهتمين بمصر فبلاش كلمة أقباط دي متضحكوش علينا وعلى نفسكو، قبطي يعني مصري مش يعني مسيحي، والحضارة القبطية بدأت ف القرن التالت قبل الميلاد يعني جزء منها مش مسيحي، في حين إن لو اتكلمنا عن أكتر لغات اتكتب بيها نصوص مسيحية فهم السريانية واليونانية والروسية والعربية، مش القبطية خالص.

ياشباب الهوية المصرية، لازم كلنا ندعم هويتنا المصرية الحقيقية، واللي هي بتضم، جنب هويتنا الفرعونية، هنلاقي القبطية والنوبية والأمازيغية والبجا، مينفعش نتجاهل كل الثقافات دي لإن مصر هي خليط من دا كله، القبطية هي السبب ف إننا نتكشف الهيروغليفية واللي خلانا نعرف تاريخنا كله، انا بشوف ناس كتير بتتجاهل الحقبة القبطية وبتحاول تحصرها ف الكنيسة مع إن دا مش مظبوط زي ماقلت ولو عاوزين اديكو قد كده. النوبيين والحضارة النوبية زي ماقلت فوق هي مكون رئيسي ف كل مراحل مصر، وضحوا عشانها كتير، هم مساويين لينا هم مش أقل مننا فمينفعش نعمل نفسنا مش واخدين بالنا منهم، أو منتطرقش لقضاياهم أو نقرا عن حضارتهم.

انطون ميلاد حنا

antwn milad

انطون ميلاد حنا

كاتب وباحث ... صدر له كتاب اللغة المصرية الحديثة - دراسة وصفية

اقرا كمان ل انطون ميلاد حنا