المستوى الإجتماعي والسلوك الإجتماعي

مؤمن سلام

فيه صورة ذهنية ف مصر أن كل ماارتقى المستوى الاجتماعي للبني آدم كل ماراتقى سلوكه الاجتماعي، ودا بيخلينا نفتكر إن سكان المناطق الغالية ارقى وأحسن ومتحضرين عن سكان المناطق الفقيرة.

والحقيقة هي إن دا كلام مغلوط، دا كمان العكس هو اللي صحيح، ازاي بقى؟

أولا، في النهاية كلنا مصريين ولاد نفس الثقافة المصرية المنغلقة المتطرفة العنصرية، يعني كلنا جوّانا نفس نظام التشغيل القديم جدا (DOS)، فمعندناش فرق بين الفقير والغني واللي بين بين.

تانيا، كلنا عايشين في دولة غابة، وبالتالي إنك تاخد حقك أو إنك تحمي حقك دا بيعتمد على قوتك البدنية وتحالفاتك البلطجية أو قوة أموالك، أو قوة قربك من السلطة، أو زي مابيقولوا سواقين التكاتك “العيلة اللي مفهاش صايع حقها ضايع”.

الحالة الثقافية والقانونية دي، تخلي من أغلب أصحاب الطبقة العليا في مصر الأسوء من الناحية السلوكية، ليه؟
لأن الطبقة الدنيا مهما إن كان سوء سلوكها فهو محصور داخلها، وفي اللي بيخافوا منه منه حتى لو أمين شرطة، حتى لو هيئة رجل أو امرأة باين عليهم عليهم انهم من أصحاب الثروة او النفوذ حتى لو مكنوش كده، المقصود أن في حدود أصحاب المستوى الاجتماعي الأقل مبيتعدوهاش.

أما الطبقة العليا فسوء سلوكهم الاجتماعي ملهوش حدود، خاصة الأغنيا الجدد (Nouveau riche) واللي وصلوا للطبقة العليا في جيل واحد بس، وأي حد دارس بنية الاقتصاد المصري عارف ان ده مستحيل يحصل بطريقة شرعية. ودول عندهم الفلوس اللي تشتري البلطجية والسلطة، دول كمان ممكن يبقوا هم نفسهم السلطة، وعشان كده تحجيم سلوكهم الهمجي أصعب. لأنهم عارفين إن سلوكهم المتدني مش هيتعاقبوا عليه.
وتقدروا تلاحظوا دا لما تقارنوا سلوك سواقين التكاتك والتونيات، وساوقين المرسيديس والبي ام، لأنك ممكن يكون عندك شجاعة للدخول في صدام مع سواق توكتوك أو تونية، بس مستحيل يكون عندك القدرة إنك تدخل في صدام مع سواقق مرسيدس، رغم إن الكل همج.

مؤمن سلام

mo`omin cellem

مؤمن سلام

• بكالوريوس علوم سياسية - جامعة الاسكندرية • كاتب ومدير موقع حركة مصر المدنية • له كتابين على الانترنت "العلمانية ببساطة" و"الليبرالية ببساطة"

اقرا كمان ل مؤمن سلام