الحقيقة اللى اتعرت

الهلال و الصليب

غسيل فى بلكونه مواطن نزلت منه ميه على غسيل فى بلكونه مواطن اللى تحتيه والظاهر انها ميه مش ولابد يعنى ..بس“. ده كان تعليئ (تعليق) السادات على احداث الزاوية الحمرا اللى مات فيها 9 على كلام الحكومة وقتها. سبب المشكلة زى ماقال رئيس الجمهورية وقتها خنائة بين جيران ب سبب ميه الغسيل، لاكن السبب الحئيئى (الحقيقى) هو خلاف على ارض المسحيين كانو عايزين يبنوا عليها كنيسة. وبعيد عن ان الحادثة دى كان من ناتيجها اضافة الفقرة (و) لمادة 98 من قانون العقوبات المعروفة ب اسم قانون ازدراء الاديان واللى اتعملت اصلا عشان توقف التحريض ع المسحيين ب اسم الدين! ومن ساعتها وحتى من قبلها -تقريبا كدا مع بداية اللى بيسموه الصحوة الاسلامية ودولة العلم والايمان- بيحصل حوداث ضد المسيحين وغير المسليمن عامتن (عامةً). لحد الحادثة اللى شايفها كارثة هيا حادثة قرية الكرم فى المنيا اللى اتعرت فيها ست كبيرة فى الشارع. واللى عرت معها الحئايئ (الحقايق) اللى كنا بندريها.

اولها حئيئية (حقيقة) ولاد البلد والشهامة واللى شفنها اتغيرت كتير الفترة اللى فاتت من ولاد الحى اللى كانو بيحمو بنات منطئتهم (منطقتهم) ل للى بئو(بقو = اصبحو) بيتحرشوا بيهم، لحد ما وصات انهم يعرو ست كبيرة! حئيئة فشل التعامل الامنى لوحده كل مشكلة من دول تنزل قوات الامن ف البلد دى كام يوم لحد الدنيا ماتهدى وخلاص. حئيئة غياب القانون وعجزه كل المشاكل  دى يا بتنتهى بجلسات عرفية الحكم بيكون فيها ضد الضحية دايمن (دائماً)، او بهروب المجرم من العقاب إما يطلع مختل عقليا او غلط ف التحريات. حئيئة الاعلام المزيف والبوسة المزيفة والحضن المزيفين بتوع كل حادثة. الاعلام اللى بيئول مين شهيد ومين قتيل على اساس الدين.

شهيد و قتيل

حئيئة ان كلنا اخوة ومواطنين وزى بعض، لاكن لو بصيت لكل المشاكل اللى حصلت هتلاقيها بسبب حاجات هى ابسط الحقوق يا اما عايزين يبنوا كنسة او بيصلو فى بيتوهم! فيئولو (فيقولو) ألبو (قلو) البيت لكنيسة، او حاجة شخصية متخصش حد اصلا غير اطرفها مسلمة على علاقة بمسيحى، ومش العكس. وده بيعرى حئيئة تانية فى المجتمع الذكورى اللى بيعتبر الست حاجة مملوكة ليه. وغالبن (غالبأ) ممكن تكون اشاعات واخرها حادثة الكرم مسلا (مثلا). حئيئة سقافة (ثقافة) العنف والتحريض وكره الاختلاف اللى بئت (بقت = اصبحت) سايدة فى الشعب واللى معروف مصدرها فين. وده بيعرى حئيئة هو احنا فعلا بنحارب الارهاب من جدوره (جذوره) ولا بنعالج اعراضه بس بمسكنات ولا بنمسل (بنمثل) اننا بنحاربه -كان نفسى اقول ولا معندناش ارهاب اصلا بس مش قادر الحئيئة-. حئيئة ان الدين مش لللاه (لله) والوطن مش للجميع. حئيئة التقارير المضروبة وكله تمام يافندم اللى موديانا ف داهية. من اول اخبار الجيش ايه ياحكيم كله تمام يافندم وهما عارفين ان الجيش راجع خلصان من اليمن، لحد كله تمام ومعندناش مشاكل طائفية والتعليم تمام و الصحة تمام وكل الناس واخده حئوئها (حقوقها).

مشكلتنا اننا معندناش مشاكل. لازم نواجه المشاكل عشان نعرف نحلها. كله تمام يافندم دى عاملة زى واحد فى بيت جدرانه مشقئقة وراح داهنه وخلاص، ف النهاية البيت ح يئع (يقع) على دماغه. ايوة احنا عندنا تميز. هو سهل انك تبنى كنيسة؟ مش هسأل على نسبة المسحيين -مش الاقباط قبطى = مصرى- فى مناصب القيادية ف الدولة والقضاء والاعلام والشرطة والجيش ولا هو فيه كام دكتور نسا مسيحى. مش بس تميز على اساس الدين ده فكل حاجة ضد الست وضد الاسمر وضد المستويات الاجتماعية الاقل. ما هو مافيش دولة فيها مساوية وزير عدل فيها يقول ابن عامل النضافة مينفعش يبقى قاضى!

لازم نتعلم نئبل (نقبل) المختلف ونعيش معاه من المدرسة ميطلعش المسيحى من الفصل عشان حصة الدين ولا مدرسة للبنات ومدرسة للولاد. لازم نعرف ان اى حد مختلف عننا انسان زيك طالما انه بيعاملك على انك انسان زيه وما بيجبركش على حاجة ولا بيضرك. لازم ننهى العنف من جدوره. لازم القانون يمشى ع الكل ويكون فيه عقاب حقيقى. لازم نغير سقافتنا يا إما البيت هيقع على دماغنا.

محمد حامد أمين

mo amiin

محمد حامد أمين

كيميتاوى -مش عربى- ☥ - علمانى - ليبرالى - بتاع برمجة

اقرا كمان ل محمد حامد أمين