الحب والتملك والتقدير

الفيلسوف الهندي “أوشو Osho” بيقول :
( أنتا لما بتحب وردة مينفعش تقطفها ,, أنما المفروض تستمع بيها زي ما هي .. فبمجرد قطفك للوردة ديه أنتا بتفصلها عن البيئة اللي خلتها جميلة من الأساس و كأنك بتنهي سبب أعجابك بيها ! .. و هو ده الفرق بين التملك الـ possession و بين التقدير الـ appreciation ..! )

مثل مشهور بتاع الشاب اللي أعٌجب بواحدة باستايل لبس معين او سلوك أجتماعي مميز و تكون الحاجات ديه هي عامل جذب عليه !! بس مع كدة يكون عاوز يقطفها من بيئتها الخاصة ديه و يزرعها في بيئة تانية تحت أشرافه و توجيهاته !! .. أو بنت أعجبت بواحد له طقوس حياتيه معينة في بداية علاقتها بيه شادتها و لفتت انتباها , بس يبقي طول همها اثناء تواجدها معاه هي انها تقتل الطقوس ديه جواه و تخليه علي مزاجها ..!

بس خلينا نرجع شوية لمثل أوشو و نسأل ليه بنقطف الوردة اللي بنجبها ؟!! أو بمعني أصح ليه مفيش ثقافة التقدير مع الورد ؟!!
1- تخيل كدة أنتا ماشي في الجنينة ما و لاقيت وردة شكلها تحفة أول حاجة حتيجي في دماغك ” لازم الوردة ديه تبقي معايا ” فأنتا أول حاجة فكرت فيها هي رغبتك المجردة في الحصول علي الوردة بغض النظر عن رغبة الوردة ايه ؟!! .. فانتا نسفت حرية الوردة او قرارها الشخصي و تعاملت انك الواصي الوحيد عن مصيرها .. و المبرر أن ده عادي فديه مجرد وردة !!
2- تاني حاجة بتفكر فيها ” هو أنا لو سبت الوردة هنا مش ممكن يجي حد تاني يقطفها ” , فمعرفتك التامه ان الورده غير واعية و ممكن اي حد ينجذب بيها يشدها او يخطفها بيخليك عاوزك تخبيها او تبعدها عن نظر اي حد … فانتا معندكش الثقة في الوردة انها تقدر تنحاز لاعجابك بيها او تقديرك ده .. فأسهل حاجة تاخدها لنفسك و تقفل عليها عشان تضمن أنك المستمتع الوحيد .. !

المشكلة بقي اننا مش بنحب ورد انما بنحب بشر ليهم كيان و شخصية ! .. فماينفعش تحب اي مسمي نتغافل عن قرارتهم او أختيارتهم لمجرد اننا مش قادرين نفهمها او نتماشي معاها .. و برضة مينفعش نسقط عليهم ضعفنا بشخصيتنا و هاجسنا المستمر أنهم ممكن يكونوا عناصر جذب لناس تانية فنحاول نشوههم او نفسد شكلهم الجميل عشان نقتل اي سحر او بريق فيهم !! .. فبداية الانتقال من ثقافة التملك لثقافة التقدير هي في أدراك اننا بنحب ناس ناضجة حرة , ناس أختارتنا زي ما احنا اختارناهم , ناس بنثق فيهم زي ما بنطالبهم يثقوا فينا .. ففي النهاية ملخص غرس ثقافة التقدير في تعاملنا مع الاخر هو أدراك اننا بنحب بشر .. مش جماد .. مش حلويات .. مش ورد !

 

كيرلس بهجت

kirolloc be\get

كيرلس بهجت

طبيب مهتم بالقراية والتدوين

اقرا كمان ل كيرلس بهجت