الحب الصح

في جملة بتقول True Love Isn’t Something You Find, It’s Something You Build بمعنى ( الحب الصح مش حاجة بنلاقيها , أنما حاجة بتتبني ) ….
في وجهة نظر بتقول اننا في رحلة بحثنا عن شريك , بنكون بندور علي الحب … اعتقادا أن الحب حاجة بعيدة عننا ومهمتنا المستمرة اننا نفضل ندور عليها في شخص الشريك ده .. وساعة لما نوصل للشريك المناسب بالنسبة لنا يبقي خلاص كدة, لاقينا الحب واتقفلت القصة , دية النهاية ! .. و تطلع جمل زي ( اخيرا لاقيت حبي معاكي ) , ( خلاص مش حدور على حب تاني بعدك ) وحاجات من النوع ده ..

وهنا الأزمة الحقيقية ..

الموضوع عامل – مع فارق التشبيه طبعا – زي حد عاوز يعمل أكلة معينة , فنزل يجيب المقادير وفضل يدور ويدور واخيرا لقى أحسن مقادير ممكن يجيبها .. اشتراها ورجع بيها البيت .. فمهما كانت المقادير هي افضل حاجة في السوق, في الحقيقة ملهاش اي قيمة فعلية بالنسبة للشخص لو مشتغلش عليها و صمم انه يعملها أحسن أكله !! فحتي بعد ما وصلت للمقادير , لسه فيه مجهود لازم يتبذل ,, مينفعش تجيبها و يبقي خلاص كدة دورك انتهى ..!
ونظرا اننا مش بنحب مقادير أنما اشخاص بتفهم و بتتفاعل , فالموضوع بيكون عاوز تعب و تفاني من الطرفين عشان يبنوا بصدق الحب اللي بينهم .. عشان يطبعوا علي بعض ويبنوا مساحات تواصل حقيقية .. عشان يصارعوا اي اختلاف بسيط فيهم و يحولوا مشاعر الحب ديه لحياة ممتعة و جميلة جوا كل واحد فيهم ,, فالكاتب Tom Robbins كان بيقول We waste time looking for the perfect lover, instead of creating the perfect love. بمعني ( أحنا بنضيع وقت كبير في التدوير علي الحبيب المثالي بدل خلق الحب المثالي ) !!

ففي النهاية الهدف مش أنك تلاقيها أو انتي تلاقيه وخلاص شكرا على كده! .. انما حتي بعد ما تلاقوا فرسان أحلامكوا أو بنات خيالكوا, فيه شغل كبير أوي لازم يتعمل عشان يتبلور الحب ده و يكبر بجد .. فالعبرة عمرها ما كانت بأغلي أو أحسن مقادير في السوق , إنما في طريقة طبخ وتنسيق الأكلة نفسها .. والوقت اللي بتقرر أن هو ده الشخص المطلوب , مش بتكون دية أبدا النهاية , أنما مجرد البداية …

بداية مشوار تأسيس الحب ..

كيرلس بهجت

kirolloc be\get

كيرلس بهجت

طبيب مهتم بالقراية والتدوين

اقرا كمان ل كيرلس بهجت