الانحياز للأمر الواقع والقرارات الحكيمة

سنة 1991, طلع علينا مجموعة من علماء الاقتصاد في المجلة العلمية JOURNAL OF ECONOMIC PERSPECTIVES بمصطلح جديد وهو الـ Status Quo Bias أو )الانحياز للأمر الواقع), و اللي كان بيوصف طريقة تفكير موجودة في الإنسان بصفة عامة قدام اي قرار جديد, فالإنسان لما بيواجه اي قرار جديد زي مثلا أنه يشتري عربية او شقة جديدة مقابل أنه يتنازل عن القديم زي بيع شقته الاصلية أو صرف فلوسه اللي في البنك، بتظهر الـ Status Quo Bias .. و يكون منحاز أكتر انه يفضل علي وضعه الحالي علي أنه يختار في حاجة جديدة ,, واللي ساعات ممكن يكون كويس عشان يحمي الانسان من التهور الأرعن أو القرارت الغير محسوبة, بس ساعات بيجي بنتايج عكسية.

تطبيقات الموضوع ده كتير اوي في حياتنا ويعتبر تفسير لسلوكيات كتير بنشوفها و مش فاهمين ليه بيحصل فيها كدة, فعلي المستوي الفردي بنشوف الزوج والزوجة أو الخطيب والخطيبة اللي بيكون في صراع مستمر فشريك عاوز يعمل خطوة جديدة في مستقبلهم مع بعض وشريك تاني قلقان من الخطوة دية وعاوز يفضل في الوضع الحالي! .. حتى الفرد نفسه في حياته ساعات كتير بيقرر أنه يعيش في وضع مش بالكفاءة المطلوبة علي انه يغامر و يروح لوضع أفضل لسه مجهول عنه, زي مثلا انه في شغلانه مقرفة بس هو خايف يسبها ويدور علي غيرها تطلع أسوء, أو حتى علاقة مرهقة بس هو خايف يسيبها ميعرفش يدخل اي علاقة تانية ويبقي ضل اي علاقة و لا ضل حيطة!!

حتي في القرارات السياسية او المجتمعية, أشهر جملة بتتقال وقت الانتخابات “الريس ده خلاص اتعودنا على قرفه ليه نجرب واحد جديد؟!!” على أساس ان القرف او الفشل السياسي امر طبيعي بس احنا بنختار القرف الأريح!!! و السؤال هنا ليه الـ Status Quo Bias متفاوت بين الناس؟ يعني الانحياز للامر الواقع و لو موجود بينا كلنا ,بس ليه في ناس عندها نقطة المخاطرة اعلي ؟؟! … الموضوع راجع للتجارب الحياتية و الحالة المسيطرة علي الفرد في اتخاد القرار … يعني كل ما يكون الإنسان تحت ضغط وتعب كل ما كان مدي انحيازه للوضع المقرف اكتر! و ده اللي ممكن يكون مش منطقي ؟! يعني المفروض يحصل العكس بس مش ده اللي بيحصل …

العقل البشري دايما في حساب خطر المجهول بيضاعف الإدراك, فعمره ما بيكون حيادي في توزان القرارات, فلو الوضع (أ) سئ بس احنا عارفينه و وضع (ب) ممكن يكون كويس بس أحنا لسه مش عارفينه, العقل بيزود التفضيل لـ ( أ ) و يزود الخوف والقلق من ( ب ) .. فالعقل تحت الضغط بيكون عامل زي المنهك مش مستحمل يجرب اي حاجة تاني, فهو علي أخره وده عشان يخليك تفكر في الموضوع كذا مرة مش تتحول لمشلول عاجز وتقول خلاص مش حعمله !! … في النهاية, يمكن لو الناس ادركت موضوع الـ Status Quo Bias حتعرف ليه هي ساعات بنتحاز لواقع مش مناسب على انها تجازف وتشوف مجهول ممكن يطلع افضل, ساعتها ممكن نسيب العلاقات اللي مش مريحنا, نرفض الشغل اللي بيقتل احلامنا وافكارنا, نثور على فشل سياسي مصور لنا إن ده افضل حاجة لينا !! … فمش دايما اللي نعرفه أحسن من اللي منعرفوش ..

كيرلس بهجت

kirolloc be\get

كيرلس بهجت

طبيب مهتم بالقراية والتدوين

اقرا كمان ل كيرلس بهجت