ازاي بنكتب (2)

انطون ميلاد

حاجة من الحاجات الغريبة ف كلامنا ف مصر هي جملة “قام قعد يكتب” دايما الناس بتتكلم وبتتريق عليها ونفسها تعرف هي ايه دي، وإزاي يعني واحد “قام” و”قعد” و”كتب” ف نفس ذات اللحظة.

فعليا طول ما احنا بنفكر ف اننا بنتكلم عربي، مش هنعرف يعني “قام قعد يكتب”، إلا إذا غيّرنا طريق تفكيرنا شوية، وبصينالها على أنها لغة مصرية جديدة. ف كتابي “اللغة المصرية الجديدة- دراسة وصفية”، اتكلمت عن الفعل المساعد كعنصر من العناصر المهمة في بناء الجملة في اللغة المصرية الجديدة.

الفعل المساعد في اللغة المصرية الجديدة، بيساعد على فهم حلة الفعل، زي ف مثلنا الشهير “قام قعد يكتب”: هو هنا مقامش وبعدين قعد وبعدين كتب، لكن هنلاقي إن الجملة عبارة عن فعلين مساعدين “قام قعد” وبعدين الفعل الرئيسي “يكتب”، وقام هنا بتدل على تغيير ف الموقف، يعني مثلا كان مفيش حد عاوز يكتب الموضوع فهو “قام” يكتب الموضوع، أما قعد فبتدل على استمرارية حدوث الفعل، فهو “قعد” يكتب لفترة طويلة.

لو حبينا إننا نترجم الجملة دي للغة العربية الفصحى هنقول مثلا: “ثم بدأ في الكتابة وظل يكتب …”

الفعل المساعد برضه بيدل على زمن وقوع الفعل زي مثلا، ف الحاضر التالت (الحاضر المستمر): واللي بيتكون من الضمير + ابتدى/ابتديت+ الفعل، زي مثلا: أنا ابتديت أعمل الواجب، هنا هو ابتدا يعمل الواجب وهو “مستمر” في عمل الواجب وهو بيقول الجملة. وبرضه هنلاقي الفعل المساعد في حالة الماضي التاني، واللي بيتكون من الضمير+ كان مصرفة مع الضمير+ متعود مصرفة مع الضمير+ الفعل في الحالة المصدرية، زي مثلا: هو كان متعد يمشي من الشارع دا، هنا الفعل المساعد الأول “كان” وضحلنا إن موضوع الحديث كان ف الماضي، والفعل المساعد التاني “متعود” وضحلنا إن الموضوع كان مستمر لفترة طويلة.

إنما لو بصينا للفعل المساعد ف اللغة العربية الفصحى، هنلاقيه مش بنفس ثراء الفعل المساعد ف اللغة المصرية الجديدة، مش مستحب استخدامه، وبيعتبر ركيك، لإنه فعليا ملهوش أي لازمة فيها. زي مثلا لما نقول
“قام بافتتاح”
هل مثلا في فرق مابينها ومابين “افتتح”؟!!!
أبدًا

الحالة الوحيدة اللي ممكن نعتبرها فعل مساعد في اللغة العربية هي لما “كان” تدخل على فعل فنقول: كان يكتب باسلوب لاذع، هنا كان أفادت الاستمرارية، يعني الجملة بتقول هنا إنه –مثلا- فضل يكتب لفترة زمنية بأسلوب لاذع. لكن لو بصينا بشكل عام للفعل المساعد ف اللغة العربية هنلاقيه حالات تعتبر شاذة، دا غير أنك متقدرش تحط أكتر من فعل مساعد ف نفس الجملة زي ف اللغة المصرية الجديدة.

انطون ميلاد حنا

antwn milad

انطون ميلاد حنا

كاتب وباحث ... صدر له كتاب اللغة المصرية الحديثة - دراسة وصفية

اقرا كمان ل انطون ميلاد حنا