ازاي بنكتب 1

انطون ميلاد

كجزء رئيسي من اهتمامتنا هو إننا نرسخ فكرة الكتابة باللغة المصرية الجديدة، ولأننا وجدنا صعوبة ف إن الناس تكتب بالمصري، فقررنا –كحركة- إننا ننزل مقالات عن إزاي نكتب بالمصري، وإزاي نترجم من عربي لمصري.

أول حاجة لازم نعرفها ف الكتابة باللغة المصرية الجديدة هو إن الاسم هو اللي بيجي الأول مش الفعل زي ف اللغة العربية.

يعني مثلا ف اللغة العربية بنقول: ذهب الولد إلى المدرسة
لكن ف اللغة المصرية بنقول: الولد راح المدرسة

بادية الجملة بالاسم دي حاجة رئيسية، ومتتغيرش، لكن لو عاوز تعمل سترس على حاجة محددة وتبينها أو توضحها تجيبها بعد الاسم على طول زي

الولد، اللي ضرب أبنك، موجود ف فصل خامسة سادس

هنا الشخص اللي قال الجملة عمل سترس، أو نبر زي ما كانو بيقولولنا ف الكلية، على إن الولد المذكور هو اللي ضرب ابن الشخص السامع. طبعا لو عاوز اعمل سترس وانا بتكلم الموضوع هيكون اسهل لأن ساعتها هخلي ترتيب الجملة زي ماهو، واللي بيحصل أني بعلّي ف تون الصوت بتاعي ف الجزء اللي أنا عاوز أعمل عليه سترس.

ف الجمل القصصية، يعني الجمل اللي بتحكي قصة، ممكن نلاقي الفعل “يكون” ف صيغة الماضي “كان” ف أول الجملة
كان في فراشة منقطة …

وهنا كان مبيديش معنى الفعل بس لكن دا بيدي دلالة

ممكن برضه نبدأ الجملة بالفعل/الخبر، بعد ما نلغي الفاعل/الاسم.

كان في فراشة منقطة، لابسة بلوزة منقطة

لو لاحظنا هنا إن ف الجملة التانية “لابسة بلوزة منقطة” اتلغى الاسم “فراشة” لأنه مذكور ف الجملة الأولانية “كان في فراشة منقطة”.

في جمل برضه بنسميها الجملة الكلمة، لانها بتبقى كلمة واحدة مش اكتر، ممكن ناس كتير متاخدش بالها منها ودا طبيعي، لان الحكومة مبتعلمناش غير اللغة العربية بس. وطبيعي إن العقل ميشوفش غير اللي هو عارفه. الجملة الكلمة عبارة عن كلمة، جت ف وسط كلام أو موضوع، فبتعبر من خلال السياق على معنى معين زي مثلا:

• روحت التوكيل عشان اسأل على قطع الغيار، ولاقيتهم بس كانت اسعارهم غالية أوي.

• وجبتهم؟

• آيوة، ما انا مضطر

ولو حللنا كلمة “جبتهم؟” هنلاقي انها اختصار لـ”هو انت جبت قطع الغيار اللي انت بتدور عليها؟”
“هو” بتيجي ف اول الجملة الاستهامية  وبتستخدم مع المذكر والمؤنث، يعني لو لاحظت هتلاقي الناس بتقول:
• هو انتي جبتي البرفيوم دا منين؟

• هو انت هتروح المعرض النهاردة؟

لكن برضه بنلاقي :هي” جت ف أول الجملة الاستهامية لما  نكون بنسال على مؤنث أو جماد أو الحي الصامت

 

ساعات بنلاقي اختصارا الناس بتشيل “هو” وتكتب الجملة كده:
• انتي جبتي البرفيوم دا منين؟
و
• انت هتروح المعرض النهاردة؟
فلما الناس بتقولها كده بيعملوا سترس على الكلمة الأخيرة من الجملة، وطبعا لإننا لما بنتكبها مفيش أي أداة نقدر نوضح بيها النبر، فمبيبقاش قدامنا غير إننا نحط أداة الاستفهام “؟”

بالنسبة لـ”انت” هنلاقيها متشالة ومحطوط مكانها التاء ف آخر الفعل “جاب”: جبت

وبالنسبة لـ”قطع الغيار اللي انت عاوزهم” هنلاقيها متشالة ومحطوط مكانهم الضمير “هم” فآخر الكلمة “جبتهم“. وبكده احنا بنشوف إن كلمة “جبتهم” هي بتحل محل جملة كاملة، وعشان كده سميناها “الجملة الكلمة”.

انطون ميلاد حنا

antwn milad

انطون ميلاد حنا

كاتب وباحث ... صدر له كتاب اللغة المصرية الحديثة - دراسة وصفية

اقرا كمان ل انطون ميلاد حنا