بيسخاي اتعملت عشان تدعبس وتشمشم على كل عناصر الهوية المصرية بكل فروعها. ولأن الكتابة هي من أهم العناصر في قيام الحضارات بشكل عام والحضارة المصرية بشكل خاص، اخترنا أن يكون اسم حركتنا بيسخاي واللي معناها “الكتابة” بالقبطي وهي كلمة جاية من كلمة “سش” المصرية القديمة بنفس المعنى. الهوية هي حاجة أساسية سواء ف حياة الفرد أو المجتمع، عشان تعرف تتقدم خطوة لازم تكون عارف انت مين عشان تقدر تعرف انت عاوز ايه وتعرف امكانياتك وتقدر تحقق التقدم اللي انت عاوزه، وهو دا اللي احنا عايزينه.

للأسف احنا منعرفش حاجات كتير عن نفسنا، تاريخنا مشوه، ومنعرفش عنه غير مواد مختارة هدفها زرع التغريب في نفسنا، ودا ادى لرفض المصري لنفسه وانتماءه لثقافة وانتمائه لثقافة تانية (عربية,انجليزية, فرنسية, هندية، تركية، كورية،…) ، احنا منبرفضش الثقافات دي لكن احنا لينا حضارتنا وتاريخنا وثقافتنا اللي بيشكلو هويتنا، أحنا من أقدم شعوب العالم ونعتبر عنصر أساسي ف مسيرة الحضارة الانسانية، ولازم نعرف نفسنا ونرجع تاني لموقعنا الاساسي كشعب فاعل في مسيرة الحضارة. بيسخاى هتكون طريقة عشان نعرف اكتر عن نفسنا وعن مصرنا وهويتنا.